Vijon prej katër orësh mbledhja e kryesisë në Partinë Socialiste, ndërkohë që detaje zyrtare nuk kanë dalë ende për publikun.
Megjithatë, burime nga selia rozë bëjnë të ditur se një nga temat e diskutimit të kupolës së PS është edhe protesta e studentëve si dhe roli i FRESSh.
Ndërkohë, mediat raportojnë se nga mbledhja në fjalë priten edhe ndryshime në radhët e ministrave.
Mbledhja e fundit e kryesisë u zhvillua me 7 shtator, ndërsa në fokus të saj ishin diskutimet për zgjedhjet lokale, të cilat do të mbahen me 30 qershor 2019.
***
Kryetari i Partisë Socialiste, Edi Rama ka mbledhur prej orës 09:00 kryesinë e partisë, e cila po zhvillohet pa praninë e mediave. Në mbledhje, socialistët do të diskutojnë për qeverisjen e 1 viti në mandatin e dytë, funksionimin e partisë, protestat e studentëve, si dhe për organizimin përsa i përket zgjedhjeve lokale që janë në horizont.
Mësohet se një pikë e nxehtë e mbledhjes së sotme të kryesisë socialiste do të jetë dhe funksionimi i dobët i forumit eurosocialist FRESSH në funksion të protestës së studentëve, të cilët protestuan për 17 ditë para Ministrisë së Arsimit, Parlamentit dhe Kryeministrisë.
Ishte vetë Kryeministri Rama, i cili gjatë një takimi me studentë në një nga studiot televizive u shpreh se FRESSH-i jo vetëm nuk ka ndikuar në protestën e studentëve, por është inekzistent si forum.
Ndërsa pas katër ditësh, 28 dhjetor, PS mbledh Asamblenë Kombëtare, edhe kjo mbledhje e paparashikuar në kalendar.
Këto mbledhje vijnë pak ditë pas mbylljes së protestës së studenteve dhe një valë protestash lokale të organizuara nga Partia Demokratike nëpër disa qytete të vendit.
Në media janë artikuluar zëra se mund të ketë edhe ndryshime në qeveri, por vendimet politike dhe analiza e qeverisjes pritet te zhvillohen gjeresisht ne Asamblene e PS.
Vendimet që do të marrë sot kryesia e PS-së do të diskutohen pas katër ditësh në Asamblenë Kombëtare, e cila do mbahet me 28 dhjetor.
a.çupaj
