Kryesia e Kuvendit të Kosovës, edhe pse jo plotësisht e kompletuar, do të mbajë mbledhje nesër në orën 13:00.
Kryeparlamentari Dimal Basha e thirri këtë takim pas dështimit të zgjedhjes së nënkryetarit të pestë të Kuvendit, nga radhët e komunitetit serb. Por kësaj mbledhje i kanë thënë “JO”, Lidhja Demokratike e Kosovës dhe Partia Demokratike e Kosovës.
Shefja e Grupit Parlamentar të LDK-së, Hykmete Bajrami ka bërë të ditur vendimin e partisë, për mospjesëmarrje në këtë takim.
“Jo, absolutisht sepse konsiderojmë që çdo gjë që ndodh pas mbylljes arbitrate të seancës, pa konstituim të Kuvendit, është antikushtetuese. Nuk do të marrim pjesë”, ka thënë Bajrami.
Nga ana tjetër, PDK-ja ka thënë se mbledhja e Kryesisë së Kuvendit, e thirrur për të hënën, është e pakuptimtë, dhe për pasojë tha se nuk do të marrë pjesë në të. Arsye bazë, sipas kësaj partie, është fakti se Kuvendi nuk është konstituuar ende.
“Zvarritjet e qëllimshme në procesin e themelimit të institucioneve shtetërore të shkaktuara nga VV-ja, janë skajshmërisht të rrezikshme për Kosovën. Sot, Kryetari i Kuvendit shpalli të përfunduar konstituimin e Kuvendit të Republikës së Kosovës, pa u zbatuar në tërësi Neni 67 i Kushtetutës së Kosovës. Për Partinë Demokratike të Kosovës, Kuvendi ende nuk është i konstituuar, sepse nuk është zgjedhur Kryesia e tij në përbërjen e plotë kushtetuese. Në këto rrethana, PDK e konsideron të pakuptimtë ftesën për takim të Kryesisë së Kuvendit që nuk është konstituuar dhe nuk merr pjesë në takime të tilla, të cilat i shërbejnë vetëm agjendave partiake e jo interesit të shtetit”, thuhet në komunikatën e PDK-së.
