Përkundër kërkesave të Uashingtonit dhe Brukselit se parlamenti duhet të zbatojë ligjin për zgjedhjen e një Kryeprokurori të Përkohshëm deri sa të ngrihet Këshilli i Lartë i Prokurorisë, PD dhe LSI kanë vendosur që ditën e hënë të zhvillojë një protestë kundër zgjedhjes së Kryeprokurorit. Burime nga selia blu dhe nga LSI bëjnë të ditur se ditën e hënë, kur është lënë që Parlamenti të votojë për Kryeprokuror të Përkohshëm, PD do të zhvillojë një protestë para Parlamentit, e cila do të fillojë në orën 9.30.
Qëllimi është bllokimi i zbatimit të ligjit për zgjedhjen e Kryeprokurorit. Një lëvizje e tillë nuk ishte e papritur, po të kishim parasysh se sot kryetari i PD Lulzim Basha ka thirrur edhe një mbledhje urgjente të grupit parlamentar të PD, e cila do të ketë në fokus hapat e PD kundër mazhorancës, sa i përket zgjedhjes së Kryeprokurorit të përkohshëm.
Siç është bërë e ditur, PD kërkon të mbajë ish Prokurorin e Përgjithshëm Adriatik Llalla në këtë post jashtë mandatit kushtetues, deri sa të zgjidhet Prokurori i Përgjithshëm, pas ngritjes së KLP. Kësaj proteste mësohet se do t’i bashkangjitet edhe LSI. PD dhe LSI gjatë këtyre javëve të fundit jo vetëm janë shprehur kundër Kryeprokurorit të Përkohshëm, por kanë sulmuar ashpër zyrtarë të lartë të SHBA dhe Brukselin se janë blerë me para të trafikut të drogës nga ana e qeverisë Rama. Madje edhe zyrtarët e lartë të Brukselit që kanë vlerësuar reformat në Shqipëri janë etiketuar nga opozita shqiptare si “njerëz të dehur”.
