Kryetari i Parlamentit izraelit i cili ka mbërritur për një vizitë zyrtare në vendin tonë ka vijuar axhendën e tij me një fjalim para deputetëve të Kuvendit gjatë zhvillimit të seancës. Yuli Yoel Edelstein tha gjatë fjalës së tij se shqiptarët janë miq të hebrejve dhe u kanë dalë atyre në krah gjatë holokaustit.
Sipas kreut të parlamentit izraelit lidhjet mes dy vendeve u testuan gjatë holokaustit, kur shqiptarët siguruan mbijetesën e hebrenjve. Edelstein tha se populli izraelit do të jetë mirënjohës ndaj shqiptarëve.
“Lidhjet tona bazohen në vlerat tona të përbashkëta. Kemi bërë progres të rëndësishëm në zhvillimin e marrëdhënieve tona, por unë besoj se ka ende shumë për të bërë bashkë. Shpresoj ta shtojmë këtë partneritet në fusha të tjera. Lidhjet tona u testuan gjatë Holokaustit, ku në fakt vlerat unike të shqiptarëve bënë që të siguronin jetesën e hebrenjve që kishin ardhur. Shqipëria ka qenë i vetmi vend i pushtuar në botë, ku numri i hebrenjve në vend u shtua gjatë viteve të luftës. Populli i Izraelit do t’iu jetë gjithnjë mirënjohës. 70 vjet pas holokaustit këto vlera janë ende të vërteta në Shqipëri. Ne do të jemi të kënaqur dhe të lumtur që ta ndihmojmë Shqipërinë që të marrë atë pritje që meriton në arenën ndërkombëtare. Falënderoj homologët e mi shqiptar për një ditë të shkëlqyer diskutimesh, dhe shpresoj që puna jonë do të japë një kontribut në zhvillimin marrëdhënieve tona”- deklaroi kryeparlamentari izraelit.
Zoti Edelstein shprehu falënderime edhe për dekoratën “Gjergj Kastrioti Skënderbeu” që iu akordua nga presidenti Bujar Nishani, me sugjerim të Kuvendit të Shqipërisë.
