Kryeministri Edi Rama ka njoftuar hapjen e parkut tek Kryeministria për të parë Live ndeshjen Danimarkë-Shqipëri që do të zhvillohet më 4 shtator, e vlefshme për kualifikueset e Evropianit France 2016. Ka qenë vetë kryeministri i cili përmes një postimi në rrjetet sociale ka njoftuar hapjen e fushës së Parkut të Kryeministrisë, ndërsa fton të gjithë sportdashësit që së bashku me të, t’i japin mbështetje kuqezinjve.
“MBRËMJA KUQEZI E 4 SHTATORIT. Kuqezinjtë në fushën e Parkut të Kryeministrisë mbrëmjen e 4 shtatorit me synimin për të hedhur një hap vendimtar drejt Francës 2016; një moment historik për Kombëtaren që është me afër se kurrë në realizimin e një misioni gjithnjë të pamundur deri më sot. Dhe kjo me Danimarkën është sprova e parë e katër ndeshjeve vendimtare për ta kurorëzuar me sukses këtë moment të jashtëzakonshëm. Prandaj kush dëshiron t’ia japë mbështetjen e vet Kuqezinjve nga fusha e blertë e Parkut të Kryeministrisë është i mirëseardhur #ForcaShqiperia” shkruan Rama
