Ndërkohë që hetuesit po përpiqen të përcaktojnë nëse bashkëbisedimi midis Benzemasë dhe Valbuenës “ishte thjesht një këshillë miqësore apo pjesë e komplotit të shantazhit,”, Kryeministri i Francës komentoi mbi të ardhmen e Benzema në kombëtaren e “gjelave”. “Një sportist i madh duhet të jetë shembullor…Në rast se nuk është i tillë, atëherë ai nuk ka vend në ekipin e Francës”, – deklaroi Manuel Valls në radion “Europe 1” duke komentuar kështu skandalin që ka përfshirë sulmuesin e Realit, Karim Benzema. Komentet e Valls vijnë pas pikëpyetjeve të ngritura në mesin e muajit nëntor mbi përfshirjen ose jo të Benzema në kombëtaren e Francës për finalet e Euro 2016.
Ndërkohë edhe Samir Nasri i është përgjigjur deklaratave të Mathieu Valbuenës, i cili pati deklaruar se nuk do të habitej nëse edhe Samir Nasri do të kishte gisht në këtë ngjarje, teksa mesfushori i Lionit tha se nuk gëzonte një marrëdhënie të mirë me fantazistin e Manchester City-t. Përgjigja e Nasri ishte eksplicite: “T’iu them të drejtën as më plas fare për këtë historinë e “videos seksi”. Nuk është problemi im dhe s’kam të bëj fare. Nëse ai dëshiron të ngatërrojë të gjithë sepse unë njoh njerëz që janë cituar në këtë ngjarje, atëherë është e drejta e tij. Në çdo rast, ai nuk ka të drejtë të hedhë baltë mbi emrin tim apo ta përmendi atë nëse unë nuk kam aspak lidhej me këtë histori. Ai mund të shihte lehtësisht që unë nuk përmendem në asnjë regjistrim apo bashkëbisedim. Unë nuk flas me askënd që është implikuar në këtë ngjarje.”/Telesport
