Norvegjia shpreson të ruajë prirjen e shkëmbimeve të nivelit të lartë me Kinën, të zgjerojë bashkëpunimin në fushat e reja, si ekonomia e gjelbër dhe inteligjenca artificiale, dhe të forcojë komunikimin e bashkërendimin në çështjet ndërkombëtare e rajonale, duke mbështetur Kombet e Bashkuara në luajtjen e rolit të tyre thelbësor dhe duke ruajtur multilateralizmin.
Kështu u shpreh të hënën kryeministri norvegjez Jonas Gahr Store në takimin që pati me ministrin e Jashtëm të Kinës Wang Yi në Oslo.
Gjatë takimit, kryeministri Store theksoi që marrëdhëniet norvegjezo-kineze u vendosën në bazë të respektit të ndërsjellë dhe të trajtimit të sinqertë të njëri-tjetrit dhe janë zhvilluar normalisht në përgjithësi. Pala norvegjeze i vlerëson sukseset kolosale të zhvillimit të arritura vitet e fundit nga Kina, veçanërisht daljen e dhjetëra milionë vetave nga varfëria.
Nga ana e tij, Wang Yi tha se vizita e suksesshme e kryeministrit Store në Kinë më 2024 ka nxitur zhvillimin e marrëdhënieve dypalëshe. Besimi reciprok dhe miqësia midis liderëve të të dy vendeve u kanë dhënë marrëdhënieve dypalëshe garancinë e rëndësishme politike. Norvegjia është ndër vendet e para perëndimore që vendosën marrëdhëniet diplomatike me Kinën dhe kjo mishëron largpamësinë strategjike të palës norvegjeze. Me përpjekjet e tyre të përbashkëta, të dyja vendet kanë ruajtur prirjen e zhvillimit të marrëdhënieve kino-norvegjeze, duke kapërcyer sistemet shoqërore dhe ndryshimet historike e kulturore. Në bazë të frymës së respektit të ndërsjellë, të dyja palët kanë shtuar besimin reciprok gjatë bashkëpunimit dhe trajtimit si duhet të mosmarrëveshjeve. Marrëdhëniet dypalëshe u kanë kaluar sprovave të ndryshimeve ndërkombëtare dhe janë bërë më elastike dhe të qëndrueshme.
Kryediplomati kinez shprehu gjithashtu shpresën që Norvegjia do të vazhdojë të luajë rol shembullor për nxitjen e bashkëpunimit Jug-Veri, ndërkohë që edhe pala kineze do të nxitë aktivisht bashkëpunimin Jug-Jug, në mënyrë që të dyja palët të japin bashkërisht kontribut për përparimin e njerëzimit.
Gjatë vizitës së tij në Norvegji, Wang Yi zhvilloi bisedime edhe me homologun e vet norvegjez, Espen Barth Eide.
