Kryeministri dhe ministri i Jashtëm i Katarit, Sheikh Mohammed bin Abdulrahman bin Jassim Al Thani, ka paralajmëruar se pasojat e luftës SHBA-Izrael ndaj Iranit kanë shkaktuar një tronditje të madhe në Lindjen e Mesme dhe më gjerë.
Duke folur të dielën në hapje të një aktiviteti të Forumit Ekonomik të Katarit në Nju Jork, në kuadër të takimeve për Asamblenë e Përgjithshme të OKB-së, kryeministri i shtetit të Katarit e përshkroi ndikimin ekonomik të konfliktit si “një tërmet”, valët goditëse të të cilit kanë prekur edhe ekonominë dhe sigurinë përtej kufijve të rajonit.
Sipas tij, kriza ka vënë në pikëpyetje disa prej supozimeve mbi sigurinë dhe stabilitetin në Lindjen e Mesme. Ai tha se gjatë krizës, diskutimet mes vendeve nisën kryesisht me çështjet e sigurisë dhe shtensionimit, por më pas u zhvendosën te furnizimet me energji, rrugët detare të transportit dhe planet e investimeve.
“Kur kaq shumë gjëra po ndërpriten, çfarë mund të mbështetet ende?”, u shpreh Sheikh Mohammed, duke nënvizuar pasigurinë e krijuar nga konflikti.
Kryeministri i Katarit bëri thirrje për krijimin e një kuadri rajonal ku sovraniteti i shteteve të respektohet dhe ku asnjë shtet të mos jetë në gjendje të përbëjë kërcënim për një tjetër.
“Siguria e përhershme nuk mund të ndërtohet përmes marrëveshjeve që e lënë një shtet përgjithmonë të ekspozuar ndaj pasigurisë”, deklaroi ai, duke shtuar se duhet të trajtohen burimet e tensioneve dhe të ndërtohet besimi mes vendeve.
Në të njëjtën kohë, Doha po përpiqet të tregojë se ekonomia e saj mbetet e qëndrueshme, pavarësisht tronditjeve rajonale. Sheikh Mohammed njoftoi se Katari planifikon të investojë më shumë se 38 miliardë dollarë në infrastrukturën vendase gjatë pesë viteve të ardhshme. Sipas kryeministrit, investimet synojnë gjithashtu të tërheqin kapital privat dhe të përcjellin një mesazh për qëndrueshmërinë ekonomike të vendit.
Ndërkohë, zëdhënësi i Ministrisë së Jashtme të Katarit, Majed Al-Ansari, deklaroi të dielën në Nju Jork se përpjekjet e Dohas për ndërmjetësim po vazhdojnë. Sipas tij, Katari po punon për të rifilluar bisedimet mes Teheranit dhe Uashingtonit me synimin për t’i dhënë fund konfliktit.
Çështjet e sigurisë në Lindjen e Mesme, konflikti me Iranin, furnizimet energjetike dhe pasojat globale pritet të jenë ndër temat kryesore gjatë punimeve të Asamblesë së Përgjithshme të OKB-së. Liderët e vendeve të Gjirit pritet gjithashtu të zhvillojnë takime me presidentin amerikan Donald Trump gjatë javës në Nju Jork.
