Kryeministri i Belgjikës Bart De Wever u takua të martën në Bruksel me ministrin e Jashtëm të Kinës Wang Yi.
Belgjika dhe Kina kanë një histori të gjatë shkëmbimesh, dhe marrëdhëniet miqësore ndërmjet të dy vendeve janë aktive, duke luajtur një rol kyç në bashkëpunimin BE-Kinë, tha De Wever gjatë takimit.
Edhe pse Evropa dhe Kina kanë perspektiva të ndryshme, përballë gjeopolitikës aktuale komplekse, të dyja palët duhet të forcojnë shkëmbimet dhe të rrisin besimin e ndërsjellë, shtoi kryeministri i Belgjikës, duke vënë në dukje që vendi i tij beson fuqimisht në multilateralizmin, mbështet forcimin e autonomisë së Evropës dhe mirëpret rezultatet pozitive nga takimi i udhëheqësve Kinë-BE.
Ndërsa ministri i Jashtëm kinez Wang Yi, theksoi se Belgjika është një vend anëtar themelues i Bashkimit Evropian dhe selia qendrore e BE-së, dhe luan një rol unik në procesin e integrimit evropian dhe në shkëmbimet Kinë-BE.
Pala kineze e vlerëson politikën racionale e pragmatike të qeverisë së re belge ndaj Kinës dhe është e gatshme ta çojë përpara miqësinë tradicionale me Belgjikën e të nxisë përparimin e vazhdueshëm e të qëndrueshëm të partneritetit të gjithanshëm miqësor të bashkëpunimit kino-belg, u shpreh kreu i diplomacisë kineze.
Pala kineze i përmbahet zhvillimit me cilësi të lartë dhe hapjes me nivel të lartë, mirëpret më shumë kompani belge që të zhvillohen në Kinë dhe shpreson që edhe pala belge do të ofrojë po ashtu një mjedis biznesi të drejtë, të sigurt e të parashikueshëm për kompanitë kineze që të investojnë në Belgjikë, vuri në dukje ai.
