Monika Kryemadhi menjëherë pasi kreu i opozitës, Lulzim Basha u tërhoq nga kërkesat e tij për të rrëzuar Ramën nga qeveria dhe për të patur një qeveri tranzitore, ka thënë se për LSI muaj korrik dhe gusht nuk do të jenë muaj pushimi por muaj që do të përgatisin këtë parti për zgjedhjet që sipas tyre do të jenë më 13 tetor.

“Falenderoj të gjithë anëtarët dhe simpatizantët e LSI që bojkotuan votimet moniste të 30 qershorit, pavarësisht presionit kriminal dhe trysnisë së pushtetit me bukën e gojës dhe vendin e punë. LSI është partia e fjalës së mbajtur, e energjisë rinore, e punësimit dhe shanseve të barabarta.

Strukturat e LSI të angazhuara plotësisht në të gjithë vendin. Muaji korrik dhe gusht, jo muaj pushimi, por pune të plotë për zgjedhjet. Në këtë betejë jemi, jo për një zgjidhje të momentit për klasën politike, por për ndryshimin e sistemit për të tashmen dhe të ardhmen e shqiptarëve.

Jemi në këtë betejë jo për poste e karrike, por për ta bërë Shqipërinë shtëpinë e çdo shqiptari. Kauza e opozitës është e drejtë dhe ka mbështetjen e pjesës dërmuese të shqiptarëve. Qendrimet e LSI larg populizmit e fjalëve boshe, përgjegjësi para shqiptarëve për çdo gërme të angazhimeve tona” ka deklaruar më pas ajo.