Në shumicën e rasteve të zbulimit dhe asgjësimit të lëndëve narkotike kultivuar në zona të thella në jug e veri të vendit, Policia e Shtetit e ka të vështirë të identifikojë autorët për shkak se ata e mbjellin kanabisin në toka pa pronarë.Por ndodh që edhe të zaptojnë tokat e personave të larguar nga vendi.
Një rast i tillë është denoncuar nga kryetari i Bashkisë së Mallakastrës Agron Kapllanaj, i cilin njëherësh akuzon Policinë e Shtetit se nuk ka ndërhyrë qëllimisht në një zonë të Mallakastrës ku është kultivuar drogë.
Përmes një shkrimi në rrjetin social Facebook, Kapllanaj thotë se i është dashur të ndërhyjë me policët bashkiakë në zonën e quajtur “Lumara 2” ku kanë konstatuar me mijëra rrënjë kanabisi të mbjella. Po aty ishte ngritur edhe streha e kultivuesve.
Statusi
Të nderuar miq!
“Pas informacioneve, që sapo kanë filluar të më vijnë për zaptim të pronave publike në territorin e Bashkisë Mallkastër, dje, së bashku me Policinë Bashkiake organizova një operacion kontrolli dhe verifikimi. Nga kontrolli në zonën e quajtur “Lumara 2” konstatuam se ishin zaptuar dy parcela prej rreth 6000 m2.
Ishin punuar në të gjithë sipërfaqen dhe ishin hapur gropa gati për t’u mbjellë!! Cfare do mbillej thoni ju?? Do të mbillej bimë narkotike cannabis sativa! Do të pyesni ju se nga e kuptuat se do të mbillej pikërisht bimë narkotike??!! Sepse në njërën nga këto parcela ishte “kultivuar” fare pa teklif, një fidanishte me rreth 2500 kubikë.
E po ashtu, ishte ngritur edhe një “kamping” i pajisur mirë me tre dyshekë për të fjetur, me mjetet e punës, me tubo plastike për ujitje, orendi shtëpiake për të gatuar, madje edhe ushqime. Në pamje të parë dukej tamam një kamp veror.
Kuptohej fare lehtë se këta “kultivues” kishin gjetur garanci, qetësi dhe mbrojtje, sepse fare të patrazuar kishin gjetur guximin për të ngritur haptazi dhe kultivuar plantacionin e tyre të drogës! Më informojnë se, në këtë zonë, parcela të tilla janë shumë, madje një situatë e tillë është pothuajse në të gjithë Mallakastrën…”. (b.an)
