1.222 turistë nga Britania e Madhe kanë mbërritur sot paradite në portin e Durrësit në bordin e kroçerës “Thomson Celebration”.
Anija turistike që vjen për të pestën herë në qytetin bregdetar u ankorua në kalatën 5 rreth orës 08.00 paradite dhe Autoriteti Portual, si gjithmonë, ka marrë të gjitha masat për mikpritjen dhe për lehtësimin e kushteve të qëndrimit në portin më të madh të vendit.
Pas zbritjes në Durrës, një pjesë e turistëve kanë udhëtuar të organizuar me autobuza drejt qyteteve historike të Krujës e Beratit, si dhe drejt Tiranës. Shumë prej turistëve të tjerë kanë vizituar qendrat arkeologjike dhe muzeale të Durrësit. Nuk kanë qenë të pakët ata që kanë shijuar motin e mirë në plazhet pranë qytetit antik.
Kroçera “Thomson Celebration” me gjatësi 215 metra dhe tonazh të përgjithshëm 34 mijë ton ka flamur maltez. Ajo lundron në kuadër të një turi adriatiko-jonian dhe do të vijojë udhëtimin sot në mbrëmje nga Durresi drejt portit të Dubrovnikut (Kroaci).
