Kroacia ka vendosur dy kushte për Serbinë për të vazhduar rrugën e saj drejt anëtarësimit në Bashkimin Evropian që kanë të bëjnë me dhënien fund të ndërhyrjes në juridiksionin kroat për gjykimin e krimeve të luftës të kryera në gjithë territorin e ish-republikës jugosllave si edhe rregullimin e të drejtave të minoritetit kroat në Serbi me një marrëveshje dypalëshe, deklaroi sot ministri i Jashtëm kroat, Miro Kovaç.
”Pa plotësimin e këtyre dy kushteve, Serbia nuk mund t’i vazhdojë negociatat”, theksoi Kovaç.
Dy javë më parë, Kroacia vuri veton hapjen e bisedimeve të Serbisë me BE-në lidhur me kapitullin që rregullon të drejtat e njeriut dhe drejtësinë.
Kovaç kujtoi se Gjermania dhe Britania e Madhe e kishin kushtëzuar hapjen e bisedimeve me Beogradin me fillimin e normalizimit të marrëdhënieve me Kosovën.
Ligji që Zagrebi kërkon të shfuqizohet i lejon Serbisë të gjykojë krimet e luftës të kryera nga të gjitha palët në konfliktin e viteve ’90 të shekullit të kaluar, edhe në Bosnje dhe Kroaci, çka do të thotë shtrirje e juridiksionit serb edhe në këto dy shtete.
Ndërkohë, minoriteti kroat në Vojvodinë numëron rreth 50 mijë persona, ndaj 80 mijë që ishte para shpërbërjes së Jugosllavisë. Statusi i këtij minoriteti është i rregulluar nga një ligj serb, ndërkohë që Zagrebi kërkon tashmë një marrëveshje mes dy vendeve.