Greqia ka mirëpritur marrëveshjen mes Kroacisë dhe Italisë për përcaktimin e zonave ekskluzive ekonomike në Detin Adriatik, duke theksuar se marrëveshja fiton legjitimitetin e saj nga Konventa e OKB-së për të Drejtën e Detit (UNCLOS) e vitit 1982.
“Kjo marrëveshje është një shembull tjetër i bazës unike mbi të cilën duhet të zgjidhen këto çështje, si në rajonin e Mesdheut ashtu edhe në nivel global”, thuhet në një deklaratë të publikuar nga Ministria e Jashtme në Athinë.
Greqia po i përmbahet me rigorozitet kësaj praktike ndërkombëtare për ndarjen e detit, pasi tashmë ka lidhur dy marrëveshje përkatëse me Italinë dhe Egjiptin, ndërkohë që ka rënë dakord me Shqipërinë që ta çojë çështjen e detit në Gjykatën Ndërkombëtare të Drejtësisë në Hagë, gjithmonë në bazë të së drejtës ndërkombëtare të detit thuhet në këtë deklaratë.
“Ne u bëjmë thirrje të gjitha shteteve në rajon që të respektojnë Konventën e OKB-së për të Drejtën e Detit, e cila, siç dihet, përbën një pjesë të së drejtës zakonore ndërkombëtare“, thuhet në deklaratë, në një referencë të drejtpërdrejtë për Turqinë që pavarësisht thirrjeve nga Bashkimi Europian, nuk e ka nënshkruar ende marrëveshjen për ndarjen e Mesdheut lindor.
Kroacia dhe Italia e cilësuan si dokument historik për marrëdhëniet mes dy vendeve marrëveshjen për demarkacionin e zonave ekskluzive ekonomike detare.
Marrëveshja konfirmon vijën ekzistuese të demarkacionit të rafteve kontinentale në bashkëpunim edhe me Slloveninë.
/a.r
