Angela Merkel i ka kërkuar Shqipërisë dhe Maqedonisë që të sigurojnë kufirin me Greqinë për të mos lejuar kalimin e refugjatëve. Gjatë një konference të përbashkët me sekretarin e OKB-s, Ban Ki Moon, Merkel u shpreh se kufiri i Shqipërisë me Greqinë duhet të jetë i sigurt.
“Të sigurohen kufijtë e Shqipërisë dhe Maqedonisë me Greqinë. Për azilkërkuesit duhet të sigurohet strehimit por fillimisht kemi shumë nevojë që kufijtë e Shqipërisë dhe Maqedonisë të jenë të sigurt” – u shpreh kancelarja gjermane.
Këto deklarata të Angela Merkel vijnë vetëm pak ditë pasi autoritetet shqiptare kanë nisur të kontrollojnë kufirin me Greqinë për të mos lejuar kalimin e refugjatëve.
Prej ditësh flitet se një valë emigrantësh pritet ti drejtohen Shqipërisë, pasi ata janë bllokuar në Greqi. Më problematike situata paraqitet në kufirin me Maqedoninë, por një rrezik i tillë pritet të përfshijë edhe Shqipërinë.
Aktualisht policia po kontrollon të katër pikat kufitare me Greqinë, atë të Kakavijës, Kapshticës, Tre Urat dhe Qafë-Botës. Në konferencën me Sekretarin e OKB-s, Merkel theksoi se çelësi për zgjidhjen e krizës me refugjatët është marrëveshja me Turqinë dhe jo mbyllja e kufijve brenda BE-së. Por një marrëveshje përfundimtare me Turqinë ende nuk është arritur.
Intervista për SWR, Merkel: Të mbrojmë kufijtë nga emigracioni i paligjshëm
Kancelarja e Gjermanisë, Angela Merkel, është shprehur gjatë një interviste për Radion gjermane “SWR” se 28 vendet e BE kanë rënë dakord për mbrojtjen e kufijve nga emigrantët e paligjshëm.
Në një kohë kur vala e emigrantëve siriane pritet të godasë Europën, duket se pozicionimin i vendeve të Bashkimit Europian do të jetë për forcimin e kufijve. “Ne kemi shënuar progres në bisedimet me Turqinë për trajtimin e fluksit të emigrantëve. Pas samitit mes BE dhe Turqisë, 28 vendet anëtare të bllokut europian, janë dakord që ne të mbrojmë kufijtë nga emigrantët e paligjshëm. Detyra jonë tani është se si ne mund të ndalojmë emigracionin e paligjshëm, pasi ky fenomen po shfrytëzohet nga trafikantët dhe kontrabandistët e qenieve njerëzore dhe njëherazi ne duhet të ndajmë edhe përgjegjësitë tona humanitare”, u shpreh Merkel.
Edhe Ballkani Perëndimor rrezikohet të preket nga vala e emigrantëve sirianë. Shqipëria dhe Maqedonia janë dy vendet potenciale për tu përballur me këtë fluks.
Nga ana tjetër, Bashkimi Europian është ende në diskutime për hartimin e planit që do të bënte të mundur zgjidhjen e krizës së emigrantëve në Europë. Shqiptarja.com
