Mauricio Zamparini nuk do të jetë më presidenti i skuadrës së Palermos. Ish-numri 1 i klubit ka dhënë dorëheqjen nga ky post pas problemeve në skuadër si në aspektin ekonomik ashtu edhe në atë të rezultateve. Nuk do të zgjasë shumë dhe brenda javës do të emërohet presidenti i ri i klubit të Seria A, raporton “Corriere dello Sport”.
Drejtimin e klubit sicilian do t’a marrë një anëtar i një kompanie anglezo-amerikane, ku ka premtuar se do të investojë në projektet e “Zamparini Grup”, me përparësi sidomos në skuadrën e Palermos dhe në impianteve sportive të këtij klubi.
Objektivi i investitorëve të rinj është të çojnë klubin e Palermos në nivele të larta, të paktën në zonën e Europës brenda 4-5 vitesh. Ndërkohë, Maurizio Zamparini njihet si një nga presidentët më pasionat të Serisë A. Dikur, ai pohoi se nuk i ndiqte ndeshjet e Palermos në stadium, sepse kishte shumë emocione dhe nuk i përballonte dot, ndërsa kishte gjetur një zgjidhje.
“Para se të nisë ndeshje prenotoj një taksi dhe bëj xhiro rreth stadiumit për 90-të minuta deri sa ndeshja të mbarojë, ndërsa i ndjek takimet e Palermos përmes transmetimit të radios në taksi”, ishte shprehur Zamparini.
ma.me
