Nga Mero Baze
Ka një inkurajim të përsëritur nga Shtetet e Bashkuara të Amerikës për prokurorët që duhet të aplikojnë për t’u bërë pjesë e SPAK. Thirrja e sotme ishte me nota shumë motivuese, ndërkohë që SPAK mendohet të jetë institucioni më i rëndësishëm i akuzës në vitet që vijnë.
Inkurajimi i SHBA dhe Bashkimit Europian për këtë institucion, është i pazakontë dhe sido që ta shpjegojnë, tregon një farë hezitimi të prokurorëve për të aplikuar, hezitim që shoqëroi edhe shumë institucione të Reformës në Drejtësi, përfshi dhe institucionet kryesore të Vettingut.
Nëse e kthen kokën pas dhe shikon se sa e vështirë ka qenë të aplikoje për t’u bërë prokuror dhe të fitoje këto 25 vjet, dhe sa vështirë e ka tashmë një prokuror të aplikojë për të qenë në krye të qendrës së pushtetit të akuzës, kupton ndryshimin e madh që po bëjnë institucionet e reja të Reformës në Drejtësi.
Hezitimi për të aplikuar në SPAK apo institucione të tjera, tregon se vetë sistemi i drejtësisë e ka kuptuar rëndësinë e SPAK dhe institucioneve të reja të Reformës në Drejtësi.
E kanë kuptuar se nuk është më një vend për të rendur, për të kapur një pjesë pushteti nga drejtësia dhe për ta përdorur për vete. Ajo që është kuptuar, është se kush shkon në atë vend, duhet të marrë vendime të mëdha dhe të rëndësishme, dhe kjo ka rritur shumë hezitimin.
Shumica e atyre që po aplikojnë janë prokurorë apo magjistratë të rinj, të cilët nuk janë prekur ende nga viruset e sistemit aktual, dhe kanë besim te vetja se mund të përballen me çështje të mëdha.
Por diferenca vjen jo nga ata që aplikojnë, por nga ata që hezitojnë të aplikojnë.
Nëse Reforma në Drejtësi ka arritur një rezultat inkurajues, është pikërisht vetëdija që i ka futur komunitetit të gjyqtarëve dhe prokurorëve aktualë, se nuk janë të denjë për të riaplikuar në sistem.
Fakti që shumcia e tyre hezitojnë të aplikojnë dhe e shikojnë me frikë krijimin e këtyre institucioneve, është pasqyrë e qartë e asaj se çfarë sistemi drejtësie kemi.
Kandidaturat e pakta nuk janë dështim i reformës, ashtu siç mund të interpretohet lehtë, por suksesi i reformës. Reforma ka arritur të bindë së pari ata që nuk e meritojnë të jenë më në sistem.
I ka bindur që t’i rrijnë larg drejtësisë së re. Dhe kjo nuk është pak.
Ata që po vijnë, po motivohen nga Perëndimi dhe jo nga ato arsyet, që janë motivuar ata që kanë shkuar dikur në kursin gjashtë mujor në Plepa, apo ata që kanë blerë vendin e tyre në sistem të drejtësisë, për të shitur pastaj vendimet dhe gjykimin e tyre.
Ata tashmë janë bindur se nuk ja vlen të aplikosh për më tej. Dhe kjo shpjegon shumë jo vetëm pse SPAK po kalon në dorë të një brezi të ri, por dhe pse është trembur kaq shumë brezi i politikanve të vjetër, të cilët ndërsa SHBA bën thirrje të ngrihet SPAK, bëjnë thirrje të ngrihet populli. (Tema)
