Komisioneri Evropian për Migrimin, Dimitris Avramopoulos, do të vizitojë të premten Shqipërinë ku do të zhvillojë disa takime në të cilat do të diskutohet mbi krizën e emigrantëve.
Një ditë më parë Avramopoulos vizitoi kampin e Idomenisë në Greqi, vendi i origjinës së Avramopulos ku ka sh9rbyer si ministër disa herë.
Komisioneri përgëzoi përpjekjet e autoriteteve greke dhe organizatave ndërkombëtare, të cilat iu kanë ofruar ndihmë refugjatëve të luftës.
“Ne të gjithë kemi të njëjtin objektiv: të përmbushim në mënyrë efektive nevojat të refugjatëve dhe të lehtësojmë vuajtjet e tyre. Së bashku mund të arrijmë një qasje të përbashkët vetëm duke përdorur të gjitha mjetet financiare, materiale dhe politike që kemi në dispozicion. Tani, prioritet është ndihma humanitare dhe lëvizja e tyre nga Idomenia në zona më të sigurta në Greqi ose Shtetet e tjera Anëtare”, deklaroi Avramopoulos.
Në Greqi ndodhen aktualisht rreth 45 mijë njerëz, 12 mijë prej të cilëve në Idomeni, bën me dije Përfaqësia e Komisionit Evropian në shtetin Helen.
Javën tjetër Shqipërinë do ta vizitojë ministri i Brendshëm Italian Anxhelino Alfano për të diskutuar rreth një plani të përbashkët për këtë krizë ndërkombëtare.
