Gjatë një leksioni të mbajtur në Shkolla Ekonomike dhe e Shkencave Politike të Londrës, Guvernatori Gent Sejko diskutoi mbi sfidat ekonomike dhe financiare me të cilat përballen ekonomitë e vogla të hapura të rajonit të Ballkanit Perëndimor dhe në veçanti Shqipëria në rrugëtimin drejt Bashkimit Evropian.
Për sa i përket Shqipërisë, Guvernatori theksoi se njësoj si vendet e rajonit, edhe vendi ynë është prekur nga kriza e çmimeve.
“Ne jemi përballur me goditje të importuara nga BE-ja dhe si një përgjigje efektive kemi kombinuar instrumentet e politikës monetare, masat makroprudenciale dhe reformat e sektorit financiar. Efektiviteti i politikave të ndërmarra nga Banka e Shqipërisë u rrit nga fleksibiliteti dhe fuqia relativisht e mirë e ekonomisë shqiptare. Pavarësisht kësaj, Banka e Shqipërisë mbetet e kujdesshme dhe gjithmonë në monitorim të vazhdueshëm të ndërlikimeve të mundshme negative të situatës dhe sfidave më të cilat përballet ekonomia shqiptare”, tha Gent Sejko.
Në përfundim, Guvernatori theksoi se axhenda e politikave strukturore është thelbësore për përmirësimin e ekonomive të rajonit të Ballkanit Perëndimor, për t’i afruar ato me shtetet anëtare të BE-së dhe për të siguruar që të jemi partnerë të barabartë dhe të merituar kur të vijë koha për t’u bashkuar.
“Nëse autoritetet e vendeve të rajonit tonë vazhdojnë zbatimin e reformave strukturore, rritja potenciale do të rritet, ritmi i rritjes ekonomike do të jetë më i lartë dhe konvergjenca do të jetë më e shpejtë”, shtoi më tej Sejko.
/s.f
