E mposhtur nga Real Madridi me shifrat 5:1 pas dy ndeshjeve në Superkupën e Spanjës. Pa Neymarin. Pa një transferim për ta zëvendësuar atë. Pa shenjë të nënshkrimit të kontratës së re nga Lionel Messi, shkruan Koha Ditore.
Barcelona është në copa, vetëm tri ditë pa nisur stinori i ri. Si shkoi aq keq për skuadrën që ngriti Kupën e Spanjës vetëm tre muaj më parë? Duhet shtruar pyetjet se çfarë ka ndodhur dhe kë duhet fajësuar, apo çfarë duhet bërë.
Një pikë e mirë fillimi: Kush është fajtor për këtë rrëmujë?
Trajneri i ri i Barcelonës, Ernesto Valverde, të mërkurën mbrëma ka thënë se Neymar duhet të marrë ca përgjegjësi për këtë.
Ai tha: “Kanë ndodhur gjëra në fazën parasezonale që nuk na kanë ndihmuar ne”. Po të ishte larguar sulmuesi brazilian para fazës përgatitore të Barcelonës në SHBA, atëherë skuadra katalunase nuk do të ishte në garë me kohën tash për të gjetur zëvendësimin e tij.
Por bordi kishte shumë kohë për të vepruar. E dinte se ai do të largohej. Pse nuk veproi?
Mbrojtësi i Barcelonës, Gerard Pique, tregoi javën e kaluar: Neymar ishte duke përgatitur largimin e tij qysh në dasmën e Lionel Messit në fund të qershorit. Lojtarët e dinin se çfarë po ndodhte dhe ndonëse nuk ka ndonjë marrëdhënie mes tyre dhe drejtorëve, personat që udhëheqin klubin është dashur të dinin çfarë po vinte dhe të vepronin. (b.an)
