Një nga figurat më të shquara të opozitës ruse, Ilya Yashin, është dënuar me tetë vjet e gjysmë burg nën akuzën e përhapjes së “lajmeve të rreme” për ushtrinë e ruse.
Yashin ishte një nga kritikët e paktë të Kremlinit që qëndroi në Rusi pasi Moska pushtoi Ukrainën. Ai vazhdoi të fliste kundër luftës.
Yashin u arrestua pasi dënoi krimet e dyshuara ruse të luftës në qytetin ukrainas të Buchas.
Menjëherë pas pushtimit, Rusia e bëri krim raportimin e asaj që cilësoi si “informacion i rremë” në lidhje me luftën.
Dhjetëra rusë që atëherë janë dënuar me burg, por dënimi i Yashin është më i madhi deri më tani.
Ai e mohoi akuzën, por gjyqtarja Oksana Goryunova tha se kishte shpërndarë me vetëdije informacion të rremë për forcat e armatosura ruse.
Prillin e kaluar, ai kishte folur në kanalin e tij në YouTube për vrasjen e qindra civilëve ukrainas nga forcat pushtuese ruse në Bucha, jashtë kryeqytetit të Kievit.
Ai i tha gjykatës se kishte dhënë versionin zyrtar rus dhe ukrainas të historisë. Gjatë videos, ai ndau imazhe dhe histori nga vendi i ngjarjes nga BBC dhe të tjerët. Ministria ruse e mbrojtjes i ka dënuar akuzat si një “provokim” të sajuar dhe imazhet e civilëve të vdekur si “të inskenuara”.
Prokurorët kishin kërkuar një dënim me nëntë vjet burg. Avokatja e tij Maria Eismont tha se ata do të apelonin kundër vendimit.
Në një postim në aplikacionin e mesazheve Telegram, Yashin u tha mbështetësve se nuk kishte arsye për t’u trishtuar: “Ne thamë të vërtetën për krimet e luftës dhe bëmë thirrje për t’i dhënë fund gjakderdhjes”.
/e.d
