Kryetari i Kuvendit, Ilir Meta u shpreh te premten ne nje emision televiziv se, Presidenti i ardhshëm i Republikës duhet të jetë sa më konsensual të jetë e mundur.
Gjate intervistës, Meta u shpreh i gatshëm për çdo takim me kreun e opozitës, Lulzim Basha.
“Unë e kam takuar Lulzim Bashën edhe në momente të tjera të tjera siç ishte ai për reformën në drejtësi. Unë jam i hapur për çdo takim që do të çojë në zgjidhjen e problemeve. Unë takoj çdo person dhe jo më të mos takoj kreun e një partie parlamentare që nuk është në parlament” – tha Meta.
I pyetur për zgjedhjen e Presidentit të ardhshëm, Meta e kosnideroi një proces të rëndësishëm dhe që duhet të zgjidhet me konsensus të plotë ndërsa mohoi kandidaturën e tij.
“Jemi në një moment delikat për këtë. Këtë e mohoj që thatë ju. Kam thënë që jam kryetar i LSI-së. Kam marrë një mandat për të drejtuar këtë lëvizje dhe s’mund ti shmangem kësaj përgjegjësie. Na duhet të jemi tepër të kujdesshëm dhe të përgjegjshëm për këtë çështje. Ajo që theksoj në këtë moment kur ngrihet problemi i reformës zgjedhore, është shumë e rëndësishme që ky proces të zhvillohet në një normalitet dhe atmosferë konstruktive. Duhet të shkojmë në zgjedhje duke normalizuar këtë situatë dhe duhet të shkojmë në zgjedhje me kandidatura dinjitoze. Për mua emri nuk ka rëndësi që ka të bëjë me përfaqësim politik. Ai duhet të jetë një njeri që duhet të gëzojë respektin e të gjithë palëve dhe të jetë faktor pozitiv i zhvillimeve që kemi para. Nuk duhet të shkojmë në një situatë ku duhet të kontestohet çdo institucion në vend. Rendësi ka klima politike”, tha Meta.
Kryeparlamentari, njëherësh kreu I LSI, Ilir Meta, i pyetur nëse është dakord për Qeveri Teknike kërkesë e vazhdueshme e PD që nga nisja e protestës, tha se “Opozita duhet të vijë në parlament, të vazhdojë axhenda e parlamentit, të vazhdojë dialogu së bashku me OSBE për të zgjidhur disa nga çështjet që mund të zgjidhen. E papranueshmë për mua është rruga e ultimatumit. S’duhet të sakrifikojmë zgjedhjet e 18 qershorit..Pa arritur standardin më të larta në këto zgjedhje, do e kemi të pamundur hapjen e negociatave”. /b.d
