Kristi Maze, djali 10 vjecar që vuan nga tromboza në mëlçi, vijon të jetë ende nën përkujdesin mjekësor në Itali, pasi ai ende nuk i është nënshtruar ndonjë operacioni. Ndonëse gjithshka për shëndetin e tij u mor me shumë urgjencë, megjithëse pati edhe një fushatë mediatike për të mbledhur fonde për kurim, sëmundja e Kristit u provua se nuk është thjesht një çështje parash.
Lajmet më të fundit që vijnë nga spitali ku është shtruar, tregojnë se djali 10 vjeçar ndodhet aktualisht në fazën përgatitore, para hyrjes në operacionin e transplantit. Burime spitalore informojnë se Kristi është trajtuar me procedurën mjekësore që synon përmirësimin e funksionit të mëlçisë, në kushtet kur situata e tij klinike ka të bëjë me pamjaftueshmërinë e mëlçisë. Fëmija shqiptar është ende në spital dhe situata e tij klinike në këtë moment nuk e lejon ende një transplantim të mëlçisë, njoftojnë burimet nga spitali. Mjekët bëjnë të ditur se Kristi është në listë pritje për të gjetur një donator për mëlçinë, pasi objektiv kryesor është transplanti. Një procedurë që nuk dihet sa mund të zgjasë dhe gjatë së cilës ai duhet të ndodhet jo më shumë se disa orë larg spitalit, në rast të gjetjes së një donatori. Ndërkohë vijon puna dhe për optimizimin e gjendjes së pacientit në mënyrë që nëse gjendet donatori për mëlçinë, atij menjëherë t’i bëhet transplanti.
Problemi shëndetësor i Kristi Mazes u bë temë e nxehtë debati mediatik e politik, pak javë më parë. Asokohe u krijua idea se për operimin e tij po pengonte vetëm çmimi i lartë i transplantit. Kjo e zhvendosi gradualisht presionin mbi organet shtetërore shqiptare, të cilat u akuzuan se nuk po jepnin ndihmesën e duhur në para për fëmijën e sëmurë.
Por çeshtja është shumë më e ndërlikuar sesa kaq. Ndërkohë që ministria e shëndetësisë komunikoi me strukturat mjekësore në Itali, duke lëvruar edhe paratë për transplantin, pas rënies dakord me spitalin për procedurën e transplantit, qeveria u akuzua se nuk po bënte mjaftueshëm për këtë rast delikat.
Sot, pas disa javësh nga ajo furtunë në gotën e ujit, e cila u krijua për shkaqe kryesisht politike, Kristi Maze ende nuk është gati për operacionin e transplantit të mëlçisë. Dhe arsyet kanë të bëjnë si me fazën parapërgatitore të pacientit, ashtu edhe me gjetjen e një mëlçie nga një donator, për të bërë transplantin, gjë që është shumë e vështirë. Në dallim nga transplanti në veshka, transplanti i mëlçisë është shumë më i ndërlikuar, pasi donatorët gjenden me vështirësi dhe ndryshe nga rasti i veshkave, ku mund të merret njëra prej tyre nga një i afërm, për mëlçinë është e pamundur të veprohet në të njëjtën mënyrë.
(Javanews.al) Ar.Me
