Lëkundjet që kanë nisur të ndjehen në raportin ndërmjet PS dhe LSI dhe më konkretisht ndërmjet kryeministrit Edi Rama dhe Kreut të Kuvendit Ilir Meta kanë vënë në lëvizje edhe selinë rozë.
Rrudhja e Partisë Socialiste në Parlament dhe mundësia e ndryshimit të balancave për shkak të krisjeve në koalicion ka qenë dje objekt diskutimesh në mbledhjen e grupit parlamentar të PS. Kreu i grupit parlamentar socialist, Gramoz Ruçi, u ka kërkuar deputetëve unitet në seancat plenare gjatë votimit të nismave të qeverisë, raporton “Sot”
Sipas burimeve, Ruçi ka ndarë me disa deputetë shqetësimin se punët e koalicionit qeverisës nuk po shkojnë mirë. Ruçi ka paralajmëruar deputetët për të papriturat e situatave të vështira. Ndërsa në mbledhjen e grupit Ruçi ka qenë i përgjithshëm dhe sipërfaqësor, për shkak të ekspozimit të mbledhjeve ndaj mediave, kreu i grupit të PS, mësohet se ka qenë më i qartë dhe konkret në konsulta me deputetë të veçantë.
Gramoz Ruçi ka ashpërsuar dhe intensifikuar thirrjet në drejtim të deputetëve, që të mos mungojnë në sallën e Kuvendit, aq më tepër në një periudhë jo të favorshme për koalicionin qeverisës. Gjuha e Ruçit është ashpërsuar më tepër, që nga seanca e kaluar plenare, kur dekretet e Presidentit Bujar Nishani u rrezikuan. Ishin vetëm 71 vota të mazhorancës që rrëzuan dekretin për arsimin e lartë dhe turizmin. Kjo gjë alarmoi krerët e Partisë Socialiste.
