Për të dytin vit radhazi, me rastin e Krishtlindjeve, Bashkia e Tiranës ka organizuar një koncert të madh festiv në sheshin “Shën Tereza” në kryeqytet, ku po marrin pjesë muzikantë të njohur si dhe tenorët Armando Kllogjeri, Kastriot Tusha dhe Marjana Leka
Kryebashkiaku Erion Veliaj përveç urimeve për Krishtlindjen, ka folur edhe për punën e Bashkisë gjatë këtij viti dhe për vitin e ardhshëm.
“Uroj që për të gjithë vitin tjetër, siç kemi pasur një dhjetor fantastik solidaritetit, të kemi një vit 2017-e, vit pune, solidariteti dhe dashurie për njëri-tjetrin. Garantoj qytetarët e Tiranës që bashkia do të jetë në gatishmëri të plotë gjatë festave. Bashkia e Tiranës do t’i sigurojë qytetarëve festa të gëzuara. Secili prej nesh, me dashurinë që sjellin krishtlindjet dhe viti i ri, mund të jetë një qytetar më i mirë“, u shpreh Veliaj.
Krahas këngëve të njohura të Krishtlindjeve, në koncertin festiv nuk mungojnë as perla të muzikës botërore si “New York – New York”, “You know I am no good” por edhe këngët shqiptare, si “Moj e bukura more” apo “Kur më vjen burri nga stani”.
Tenori Armando Kllogjeri dhe sopranoja Majrana Leka nën shoqërinë e orkestrës së UniArteve dhe korit të Liceut Artistik do të sjellin për kryeqytetasit edhe pjesë të zgjedhura nga opera “Turondot” e Giacomo Puçini-t apo opera “La Traviata”e Giuseppe Verdit.
Atmosfera e festës do të përcillet më së miri nga kori i fëmijëve të cilët do të sjellin një kolazh të këngëve të Krishlindjeve ndërsa koncerti do të mbyllet me një video promocionale për Tiranën, por dhe urimin e kryetari të Bashkisë, Erion Veliaj për çdo qytetar të Tiranës por edhe Shqipërisë në këtë fundvit.
Tenori Kllogjeri: Atmosfera do të jetë festive
Tenori i njohur, Armando Kllogjeri përshëndeti këtë nismë të Kryetarit të Bashkisë së Tiranës, ndërsa garantoi qytetarët për një atmosferë shumë të ngrohtë festive.
“Një falenderim shumë i madh shkon për Bashkinë e Tiranës, për Kryetarin e Bashkisë, që me iniciativën e tij na jep mundësinë për të performuar pranë publikut në këto festa Krishtlindjesh kaq të bukura. Është hera e dytë që unë marr pjesë në këtë koncert. Koncerti do të ketë një larmi shumë të madhe performancash. Do jetë, Kastriot Tusha, Marjana Leka, balerinët, do jetë Kori i Liceut, që është përgatitur nga dirigjenti Bujar Alliu, do jetë dirigjent Bujar Llapaj. Dëshira ime është që pjesëmarrja të jetë sa më e madhe, sëbashku të ngrohemi në këtë ambient, që është pak i ftohtë jashtë, por brenda shpirtërisht mendoj se do të jetë shumë i ngrohtë”, theksoi Armando Kllogjeri.
