Detaje të reja kanë dalë nga krimi i rëndë i ndodhur në Greqi, ku një 51-vjeçar shqiptar vrau mizorisht gruan e tij.
Mediat greke raportojnë se 51-vjeçari ka deklaruar në polici pas arrestimit se krimin e kreu për shkak se gruaja e mashtronte, duke e tradhtuar. Ndërkohë mësohet se viktima vetëm një orë para se të vritej me thikë nga burri, kishte bërë denoncim për dhunë, denoncim që nuk ishte i pari.
Më 18 qershor “kasapi i Zakynthos” ishte arrestuar për të njëjtën gjë. Në atë kohë ai u dërgua në prokurori dhe u la i lirë me kushtin shtrëngues që të mos i afrohej gruas. Por gruas i erdhi keq dhe e pranoi sërish në shtëpi. Dje pasdite ka nisur sërish tortura për 40-vjeçaren fatkeqe, nënë e tre fëmijëve, dy prej të cilëve të mitur.
Burri, rreth orës 20:00, filloi ta rrihte pa mëshirë, duke lëshuar mbi të tërbimin e tij të sëmurë. Gruaja në gjendje të mjerueshme dhe pasi ai ishte zhdukur, arriti të mblidhte veten dhe të kalonte pragun e Policisë për herë të dytë dhe të ngrinte padi kundër torturuesit të saj.
Autoritetet ishin në kërkim të tij dhe në orën 22:30 kur viktima kthehet në katin përdhes të dupleksit në zonën e Tsilivit, e gjen përballë. Sipas një dëshmitari okular, një fqinje, shqiptari e ka kapur nga flokët dhe e ka tërhequr zvarrë në ballkon duke thirrur “Do të të vras”. Ai goditi disa herë me thikë gruan, duke e lënë të vdekur.
Autori pasi vrau gruan e tij u largua nga shtëpia, ndërsa policia nisi kërkimet për ta gjetur. Më në fund ai është gjetur në zonën e Marathisë, në Keri, ndërsa është gjetur edhe thika e vrasjes.
