Gjykata e Krimeve të Rënda vendosi këtë të martë një dënim në total prej 55 vitesh për 5 të pandehurit e dosjes “Shullazi”. Emiljano Shullazi u dënua me 14 vite burg. Prokuroria kishte kërkuar për të 17 vite burg.
Ndërkohë u mor vendimi edhe për anëtarët e tjerë të grupit të tij. Kështu që Gilmando Dani u dënua me 12 vite burg. Endrit Qyqja dhe Endri Zela u dënuan 10 vite burg, ndërsa Blerim Shullazi me 9 vite burg.
Në procesin e ditës së sotme u dëgjua fjala e palës mbrojtëse të 4 të pandehurve Endri Zela, Endrit Qyqja, Blerim Shullazi dhe Gilmando Dani. Të pandehurit nuk ishin të pranishëm në sallën e gjyqit, por u përfaqësuan me avokatët e tyre. Në seancën e kaluar u paraqit mbrojtja e Emiliano Shullazit. Avokati i tij Vladimir Meçi kërkoi pafajësi për klientin e tij.
Trupa gjykuese dha vendimin, pasi u dëgjuan konkluzionet e mbrojtjes së 4 të pandehurve. Grupi i Emiliano Shullazit akuzohet për krijim grupi të strukturuar kriminal, kanosje për shkak të detyrës dhe shtrëngim me anë të kanosjes për dhënie pasurie.
Prokuroria e Krimeve të Rënda kërkoi në total për 5 të pandehurit dënimin me 64 vjet heqje lirie.
/b.d
