Sirenat e alarmit janë aktivizuar sërish në orët e para të mëngjesit në të gjithë Ukrainën, si pasojë e disa sulmeve ajrore të avionëve të Putin.
Raportimet nga ministria ukrainase e mbrojtjes bëjnë me dije se disa bomba ranë në pjesën qëndrore të qytetit Kryvyi Rih, duke shkaktuar viktima e të plagosur.
Në një reagim në rrjetet sociale, kryebashkiaku Oleksandr Vilkul bën me dije se sulmet ruse nuk kanë pasur objektiv tjetër përveç ndërtesave të rezidentëve, ndërsa shton se shumë nga të plagosurit janë në gjendje të rëndë shëndetësore.
I menjëhershëm ishte dhe reagimi i presidentit Zelensky, i cili deklaroi se Rusia po vijon me luftën e saj kundër qytetarëve të pafajshëm, duke bombarduar shtëpi, shkolla, e ndërtesa të tjera.
“Fatkeqësisht kemi të tjerë civilë të vrarë. Operacionet e kërkim shpëtimit vijojnë në Kryvyi Rih. Dua t’iu shpreh ngushëllimet familjarëve që kanë humbur të afërmit e tyre. Këta terroristë nuk do të falen kurrë”, shkroi Zelensky në rrjetet sociale.
Ndërkohë, një lajm i keq vjen nga Krimea, ku zyrtarët parashikojnë një situatë tepër të vështirë për këtë rajon pas shkatërrimit të digës së Kakhova.
Sipas shefit të kompanisë shtetërore të energjisë Ihor Syrota, të paktën 4 rajone të Krimesë do të kenë probleme me furnizimin me ujë të pijshëm të paktën për një vit. Probleme do të ketë dhe në furnizimin me energji pasi niveli i ujit në basen është më i ulët nga sa nevojitet.
/a.r
