Kreu i grupit parlamentar të Partisë Socialiste ka folur ditën e sotme nga qyteti i Fierit për skandalin me publikimin e të dhënave personale, duke u shprehur se kjo ishte përpjekje për të destabilizuar marrëdhënien punëdhënës-punëmarrës.
Nga Fieri Balla deklaroi se prej disa muajsh po punohet nga ekspertë të fushës për të ndryshuar ligjin për mbrojtjen e të dhënave personale, në mënyrë që të përafrohet më tej me standardet e BE-së.
Ashtu si dhe Kryeministri Edi Rama, Taulant Balla i kërkoi ndjesë atyre që janë prekur nga ky ligj, kryesisht bizneset sipas Ballës.
Balla: Ishim bashkë me kryetarin e Bashkisë, z.Subashi, në një nga qendrat e kujdesit ndaj personave të vetmuar në azilin e Fierit, ku akomodohen çdo ditë të vitit 48 të moshuar, pasi familjarët nuk kanë mundësi të kujdesen për ta. Angazhimi ynë është që të mos lëmë askënd vetëm.
Kemi festuar bashkë me ta festën e ndërrimit të viteve. Për ta familja e tyre është bashkia e Fierit, ne që jemi përfaqësues të kësaj zone. Bashkia e Fierit është model sa i takon kujdesit ndaj atyre në nevojë. Nuk dua të humb shumë minuta të vlefshme të kohës tuaj televizive, por dua të them që është krim që duhet ndëshkur ashpër. Kam thënë dje dhe dua të nënvizoj, është punuar nga ekspertë të fushës për disa muaj, për të ndryshuar ligjin për mbrojtjen e të dhënave personale.
Është momenti i duhur për të ashpërsuar penalitetet për këdo që tenton të shpërdorojë qoftë dhe duke i publikuar apo duke vënë në rrezik marrëdhënien punëdhënës-punëmarrës. I kanë shërbyer në mënyrën më të keqe një konflikti mes punëdhënësit-punëmarrësit. Përafrimi i legjislacionit shqiptar me standardet e BE-së është domosdoshmëri dhe besoj se sapo kuvendi të fillojë punën, dhe të jetë marrë opinioni i qeverisë dhe i KE-së, sepse çështja e të dhënave personale është pjesë përbërëse e atyre kapitujve për anëtarësim.
Biem të gjithë dakord që ishte përpjekje për të destabilizuar marrëdhëniet punëdhënës-punëmarrës. Ashtu siç bëri kryeministri, edhe unë dua t’i shprehja ndjesën kujtdo që publikimi i këtyre të dhënave i ka krijuar problematika, kryesisht bizneseve. Këto janë ngjarje që ndodhin në shumë vende. Kanë ndodhur në SHBA para disa kohësh me të dhëna edhe më konfidenciale./m.j
