Një bashkim shpirtëror i të gjithë shqiptarëve nëpër botë.
Kështu e cilësoi samitin e parë të diasporës, Presidenti i Shoqatës së Bashkësisë Shqiptaro-Kanadeze, Ramazan Këllezi, i pranishëm në aktivitetin historik.
Duke e konsideruar punën e tij por edhe të mbarë shqiptarëve në diasporë si shërbëtorë të kombit e atdheut (apolitik), Këllezi tregon për ATSH-në se ka 26 vite që organizohen aktivitete, promovohen libra, shkrimtarë, piktorë e artistë shqiptarë në Kanada.
“Unë punën e presidentit të shoqatës së bashkësisë shqiptaro-kanadeze e bëj në mënyrë vullnetare. Jeta jonë është e zakonshme si e gjithë shqiptarëve. Gjejmë kohë e mundur për t’iu përkushtuar aktiviteteve që kanë të bëjnë me Shqipërinë, kulturën dhe këtë e realizojmë çdo të shtunë e të dielë”, tha ai.
Më tej, ai tregon edhe për grupin e valleve “Shqiponjat e vogla” ku mësohen valle nga të gjitha krahinat e Shqipërisë.
“Çdo të shtunë, unë kam prova me grupin e valleve “Shqiponjat e vogla” që i përgatis me valle nga të gjitha krahinat e Shqipërisë. Më pas kemi mbledhje të bordit të shoqatës që marrim vendime dhe kemi programet e punës. Më 4 nëntor ne kishim përvjetorin e 26-të të shoqatës. Është një shoqatë mbarëshqiptare do ta quaj sepse kemi shqiptarë të Shqipërisë, Kosovës, Maqedonisë që janë jo vetëm anëtarë por edhe pjesë e bordit drejtues”.
Falë mbështetjes së autoriteteve lokale në Kanada, kundrejt kësaj shoqata u arrit të miratohej në parlamentin e Ontarios edhe projektligji për të shpallur nëntorin, muajin e trashëgimisë shqiptare.
“Ne promovojmë libra që botohen në Shqipëri por edhe nga shqiptarë në Kanada. Po kështu ne merremi me promovimin e personaliteteve nga bota e artit, kulturës ajo që është më e rëndësishme është kalimi i ligjit mbi trashëgiminë shqiptare që ka bërë që të na hapen dyert. Është një nisme e shoqatës tonë, e kryetares nderi të shoqatës tonë, Rukie Kondaj, që është mbështetur fuqimisht nga autoritetet lokale në Ontario”, theksoi ai.
“Ky samit i parë i diasporës ishte një bashkim shpirtëror i të gjithë shqiptarëve dhe e mira është që të vazhdojë që të kemi një samit të dytë, të tretë e kështu me radhë. Ky lloj takimi të prek “, përfundoi ai.
Më datën 3 Nëntor Parlamenti i Ontarios foli shqip./ATA/a.m.
