Drejtori i Zyrës Vendore të Regjistrimit të Pasurive të Paluajtshme Gjirokastër, Florian Hysi, reagon lidhur me kallëzimin e bërë ndaj tij nga Kontrolli i Lartë i Shtetit.
Ai mohon kategorikisht përfshirjen në çështjen e tjetërsimit të trojeve në pronësi të Bashkisë së Gjirokastrës dhe shtetit.
“Lajmi i publikuar në disa media nuk është aspak i vërtet dhe nuk ka lidhje me mua është shprehur Hysi”.
Kontrolli i Lartë i Shtetit kallëzoi në Prokurori regjistruesin e Zyrës Vendore të Regjistrimit të Pasurive të Paluajtshme Gjirokastër F.H, specialistin hartograf E.B dhe 3 ish-specialistët e ZVRPP Gjirokastër K.J, A.ZH dhe J.A më akuzën e shpërdorimit të detyrës.
“Në mospërmbushje të detyrës së tyre funksionale dhe në shkelje të dispozitave ligjore, kanë konsumuar elementët e veprës penale të “Shpërdorimit të detyrës”, të parashikuar nga neni 248 i Kodit Penal” raporton Dita.
KLSH thotë gjatë auditimit të Zyrës Vendore të Regjistrimit të Pasurisë së Paluajtshme Gjirokastër për periudhën 2012- 2015, ka konstatuar një sërë shkeljesh të dispozitave ligjore, për të cilat janë rekomanduar masat përkatëse për përmirësimin e gjendjes dhe nxjerrjen e përgjegjësive, të miratuara me Vendimin e Kryetarit të KLSH-së me nr. 51, datë 13.05.2016.
“Kanë kryer regjistrime të pasurive me sipërfaqe më tepër nga ajo e përcaktuar në Ligj, në 110 raste kanë lëshuar çertifikata mbi këto pasuri dhe 103 raste kanë lejuar tjetërsimin e këtyre pasurive, duke i shkaktuar Buxhetit të Shtetit 16 milion lekë dëm ekonomik, si dhe kanë refuzuar në mënyrë të paligjshme regjistrimin e pasurive të komuniteteve fetare”./a.m.
