Kur bëhet fjalë për procesin e dekriminalizimit, ai duhet të shtrihet edhe brenda strukturave të Partisë Demokratike. Thirrja është bërë nga kreu i PD Lushnje, Myslim Murrizi, thumbon anëtarët e partisë së tij duke deklaruar se procesi i dekriminalizimit duhet të shtrihet edhe brenda PD-së.
Murrizi nuk lë pa thumbuar as kreun e PD Lulzim Basha për të cilin thotë se nuk gjen kohë ta takojë, pasi ai është gjithnjë i zënë duke u marrë me persona me të kaluar kriminale apo edhe demokratë për shkak të shkuarës së tyre si ish-Sigurimsa.
“Problem i madh që vazhdon ta orientojë gabim, Partinë Demokratike, janë njerëz me të kaluar të pistë tek kjo parti. Asnjëherë nuk gjen radhë për të takuar kryetarin e PD-së, z. Basha, sepse në paradhomë gjen njerëz që kanë mbi supe më shumë se emrin e tyre prindëror. Janë ose servilë që nuk kanë asnjë peshë në elektorat, ose janë të urryer ndër demokratë sepse i kanë shërbyer me zell Sigurimit të Shtetit dhe njihen tek qytetarët me dy ose tre emra të tjerë përveç atyre që kanë në pasaportë, si Rjepsi ose Çorapja apo Qukapiku A ose B. Servilët dhe bastardët janë të pafytyrë dhe vazhdojnë të jenë gjithë kohën në shërbim të eprorëve të tyre. Deri kur do të vazhdojë të zbatohet “Katovica” në Shqipëri?!” shprehet Murrizi.
