Kreu i Forumit Rinor të Partisë Demokratike, Belind Këlliçi i ftuar në studion e Ora News, tha se pa një analizë të plotë, PD-ja nuk mund të ngrihet.
Ai deklaroi se ka një tentativë për ta përçarë dhe sunduar këtë parti, pa dhënë detaje se si
Këlliçi: Askush nuk e ka pritur këtë rezultat të PD dhe prandaj është e rëndësishme që PD t’i nënshtrohet një procesi të analizës së detajuar, një skaneri të funksionimit të detajuar të forumeve dhe strukturave të PD. Le ta nisim nga Forumi Rinor, nga unë personalisht. Kjo nuk duhet bërë për të kryer një “gjueti shtrigash” por për të forcuar Partinë Demokratike.
Sigurisht, që shitblerja e votave ka qenë masive, por ne duhet të shohim në radhë të parë nga vetja. Edhe kryetari i Partisë mori përgjegjësinë mbi vete. Ai e pranoi publikisht, që hartimi i listave ka qenë i mbyllur prej tij. Unë do t’i kërkoja çdo drejtuesi të Partisë Demokratike që të bënte një kërkesë për analizë.
Kurrsesi nuk mund të mendoj se nuk mund të ngrejë zërin në Partinë Demokratike sepse PD është ajo parti që inicioi mendimin ndryshe në Shqipëri dhe lirinë e të shprehurit. I bëj thirrje që çdo anëtari të PD-së të bëhet brenda forumeve të partisë.
Debat i brendshëm i PD- Ky është një debat i brendshëm i Partisë Demokratike dhe duhet të bëhet brenda shtëpisë së partisë. Unë mendoj se nëse do të kemi një analizë të mirëfilltë, PD do të ngrihet sërish fuqishëm sikundër u ngrit në vitin 2005, pasi u bashkuan të gjithë faktorët e së djathtës.
I ka dhënë provat PD se ka ditur të ringrihet.
Axhendë për përçarjen e PD: Jam i bindur që që në garën time kur kam garuar për kryetar të Forumit Rinor, kam qenë i bindur se ekziston një axhendë për ta përçarë dhe për ta sunduar më mirë PD-në. Jam i bindur që demokratët janë të zgjuar dhe do të dinë të bashkohen dhe të mos hedhin baltë të pamerituar qoftë edhe ndaj anëtarit më të thjeshtë. Kemi pasur dhjetëra të rinj që janë arrestuar. Kemi pasur të rinj që janë dënuar. Ai që ka në agjendë përçarjen dhe shkatërrimin e strukturave të PD-së, nuk e do Partinë Demokratike dhe i shërben Edi Ramës.
Fitorja e Ramës- Është një fatkeqësi e madhe që Edi Rama arriti të marrë një mazhorancë solide i vetëm si kryeministër i vendit. Është fatkeqësi kombëtar. E pamë se çfarë i solli Edi Rama 4 viteve Shqipërisë. Pamë një kryeministër që doli në fushatë me tuta pa asnjë bilanc dhe duke treguar barsoleta.
Shtyrja e garës për kreun e PD –Nuk ka qenë një kërkesë për t’u dorëhequr zt.Basha, por ka qenë një kërkesë për të nisur një proces analize të vërtetë dhe pse jo hajde të shtymë edhe datën e zgjedhjeve sepse nuk ka asnjë problem. Nuk është i rëndësishëm për momentin mandati i kryetarit të Partisë. I rëndësishëm është gjykimi i faktorëve që sollën këtë rezultat ku PD-së pas 2013-s i mungojnë 200 mijë votash. Një proces analize duhet bërë pa gjueti shtrigash, pa baltosje, pa akuza të rreme, por duke thënë të vërtetat./OraNews
