Drejtuesi i Agjencisë së Mbikëqyrjes Policore (AMP), Klevis Qose, ka zhvilluar sot (27 gusht) një takim zyrtar me Karma M. Smith, Këshilltare e FBI-së për Çështjet e Krimit të Organizuar pranë SPAK, e cila ka marrë detyrën në Shqipëri.
Përmes një postimi, Qose bëri të ditur se në fokus të takimit ishte vijimi i punës së nisur dhe koordinimi i hapave të ardhshëm, me synim forcimin e mëtejshëm të bashkëpunimit ndërinstitucional.
Qose shprehu gjithashtu mirënjohjen për Jamar Williams, për mbështetjen dhe bashkëpunimin e tij gjatë periudhës së angazhimit me AMP-në.
Në takim ishte i pranishëm edhe Richard Deasy, Atashe për Asistencën në Çështjet e Zbatimit të Ligjit pranë Ambasadës së SHBA-së në Tiranë.
Reagimi i Klevis Qoses:
“Sot pata kënaqësinë të takoj znj. Karma M. Smith, Këshilltaren e FBI-së për Çështjet e Krimit të Organizuar pranë SPAK, e cila ka marrë tashmë detyrën në Shqipëri.
Në fokus të bisedës ishte vijimi i punës së nisur dhe koordinimi i hapave të ardhshëm, me synim forcimin e mëtejshëm të bashkëpunimit mes institucioneve tona. Shpreha gjithashtu vlerësimin dhe mirënjohjen time për z. Jamar Williams për punën dhe mbështetjen e tij të çmuar gjatë periudhës së bashkëpunimit me AMP-në.
Në takim ishte i pranishëm edhe z. Richard Deasy, Atashe për Asistencën në Çështjet e Zbatimit të Ligjit pranë Ambasadës së Shteteve të Bashkuara të Amerikës në Tiranë. Bashkëpunimi me partnerët tanë amerikanë do të vijojë të jetë një element i rëndësishëm në forcimin e kapaciteteve tona dhe në përmbushjen me profesionalizëm të misionit të AMP-së”.
