Nga Ardit Rada
Reshjet, që pushtuan vendin javën që lamë pas, kanë përmbytur plot 1300 familje. Lajmi konfirmohet nga Drejtori i Përgjithshëm i Emergjencave Civile Shemsi Prençi. I kontaktuar nga JavaNews.al, Prençi shton se në total janë 2700 shtëpi dhe ambiente private që kanë pasur prezencë uji në lartësinë 10-12 centimetra, por vetëm 1300 prej tyre kanë dëme serioze.
Por pavarësisht se situata e rrezikshme kaloi, kreu i Emergjencave shprehet se hidrovoret janë ende në punë dhe po punojnë me kapacitet të plotë për largimin e ujit. Sipas tij, nga shtrati i lumit Vjosa nuk ka më kapërcime nga argjinaturat.
“Që prej 2 dhjetorit nuk bëhet më fjalë për përkeqësim të situatës apo kërcënim për jetët e njerëzve” – shprehet Shemsi Prençi për JavaNews.al.
Përballim i suksesshëm i situatës, sipas Drejtorit të Emergjencave pranë Ministrisë së Punëve të Brendshme, ka të bëjë edhe më një rast unik. Ai shprehet se për reshjet e këtij dimri duhen falenderuar në radhë të parë Gjeoshkenca dhe Gjeouji.
“Së pari duhen falenderuar për parashikimin e saktë që bënë për prurjet e reshjeve dhe lumenjve, gjë që bëri të minimizoheshin dëmet në Vlorë dhe Fier. Informimi shtatë ditë para nisjes së reshjeve ishte më i sakti dhe brenda çdo standardi dhe metodologjie të Bashkimit Evropian” – thekson Shemsi Prençi.
Ai shton për JavaNews.al se ka qenë pikërisht ky paralajmërim që shpëtoi jetët e njerëzve dhe bagëtitë, duke i ngjitur në katet e dyta dhe të treta fillimisht dhe duke përqendruar më pas të gjithë vëmendjen tek ta.
“Për të ardhmen del si detyrë që pushteti vendor dhe Ministria e Bujqësisë të kenë prioritet ndërtimin e argjinaturave, kryesisht për të parandaluar prurjet nga lumenjtë dhe përrenjtë malorë. Pasi dihet se kjo është pasojë edhe e dëmtimit të maleve dhe kodrave që u janë bërë ndër vite nga dora e njeriut” – thotë kreu i Emergjencave.
Sipas Shemsi Prençit, problematika e këtij rasti është përballuar me sukses edhe pse ende ka vend për përmirësim si në marrjen e masave, ashtu edhe në ndërhyrje. /JavaNews.al
