Në Qendrën Kombëtare të Arteve Skenike në Pekin u mbajt një pritje për 60-vjetorin e vendosjes së marrëdhënieve diplomatike ndërmjet Kinës dhe Francës.
Kreu i shtetit i Kinës Xi Jinping ,duke përshëndetur përmes videos , vuri në dukje se vendosja e marrëdhënieve diplomatike midis Kinës dhe Francës 60 vjet më parë ishte një ngjarje e madhe në historinë e marrëdhënieve ndërkombëtare. Kryetari Mao Ce Dun dhe gjenerali Sharl de Gol përdorën mençurinë dhe guximin e tyre të jashtëzakonshëm për të hapur dyert e shkëmbimeve dhe të bashkëpunimit ndërmjet Kinës dhe Perëndimit, duke i sjellë botës shpresë në mes të Luftës së Ftohtë. Gjatë 60 viteve të fundit, marrëdhëniet kino-franceze kanë qenë gjithmonë në pararojë të marrëdhënieve të Kinës me vendet perëndimore, duke sjellë përfitime për popujt e të dy vendeve dhe duke kontribuuar në paqen, qëndrueshmërinë dhe zhvillimin botëror.
Xi Jinping theksoi se historia unike e marrëdhënieve Kinë-Francë ka formuar “frymën kino-franceze” të pavarësisë, mirëkuptimit të ndërsjellë, largpamësisë dhe përfitimit të përbashkët. Duke u përballur me uljet dhe ngritjet e epokës së re, Kina dhe Franca duhet të mbështesin synimin fillestar të vendosjes së marrëdhënieve diplomatike, të përballen aktivisht me të ardhmen dhe të guxojnë për ndryshim.
“Të dyja palët duhet t’i zhvillojnë në mënyrë të palëkundur marrëdhëniet e tyre dhe t’i përgjigjen pasigurisë së botës me qëndrueshmërinë e marrëdhënieve Kinë-Francë. Ato duhet t’i marrin Vitin e Kulturës dhe Turizmit Kinë-Francë dhe Olimpiadën e Parisit si një rast për të zgjeruar shkëmbimet njerëzore e kulturore, duhet të mbrojnë së bashku barazinë dhe të kërkojnë përfitimin e ndërsjellë, të promovojnë një botë shumëpolare e një globalizim ekonomik gjithëpërfshirës,” u shpreh Xi.
Ai shtoi më tej që Kina dhe Franca duhet të vazhdojnë të japin kontribut për ruajtjen e paqes dhe qëndrueshmërisë botërore dhe për t’iu përgjigjur sfidave globale, duhet të kërkojnë përfitimin e ndërsjellë, të thellojnë bashkëpunimin tradicional dhe të eksplorojnë në mënyrë aktive industritë e gjelbra e të pastra, duke vazhduar të zgjerojnë bashkëpunimin në fushat e reja si energjia e gjelbër dhe e pastër, shkruan CMG
Presidenti francez Emmanuel Macron dërgoi gjithashtu një videomesazh. Macron-i tha se 60 vjet më parë, gjenerali Sharl de Gol e kapërceu logjikën e konfrontimit në kampe dhe mori vendimin historik për të vendosur marrëdhënie diplomatike me Republikën Popullore të Kinës. “Sot ne kemi përgjegjësinë që, mbi bazën e objektivave ambiciozë të përcaktuar në vitin 1964, të bëjmë përpjekje të vazhdueshme për të ndërtuar bashkërisht një partneritet që jo vetëm plotëson nevojat e të dy popujve, por është gjithashtu në favor të paqes dhe qëndrueshmërisë botërore. Franca është e gatshme të punojë me Kinën për t’iu përgjigjur sfidave globale dhe për të promovuar zgjidhjen e krizave ndërkombëtare. Viti 2024 është gjithashtu Viti i Kulturës dhe Turizmit Francë-Kinë, dhe të dyja palët do të zhvillojnë një sërë aktivitetesh. Ne duhet ta shfrytëzojmë këtë rast për të intensifikuar shkëmbimet ndërmjet të dy popujve, veçanërisht të rinjve, dhe për të hedhur një themel më të fortë për të ardhmen e marrëdhënieve franko-kineze,” u shpreh ai.
