Kredia e re për ekonominë pësoi një rënie të lehtë gjatë muajit gusht.
Sipas të dhënave të Bankës së Shqipërisë, kredia gjatë gushtit arriti në 40.4 miliardë lekë, 0.7% më pak krahasuar me gushtin e vitit të kaluar. Pavarësisht rënies së lehtë të shënuar gjatë gushtit, shifrat progresive të kreditimit për vitin 2026 ngelen në rritje dhe në vlerat më të larta historike.
Për të gjithë 8-mujorin 2026, kredia e re e dhënë për ekonominë shqiptare ka arritur vlerën e 301.5 miliardë lekëve, në rritje me 10.6% krahasuar me të njëjtën periudhë të vitit të kaluar.
Gjatë muajit gusht, u vërejt një ngadalësim në kreditimin e bizneseve, ndërsa kredia për individët vijoi tendencën pozitive të rritjes.
Në gusht, sektori bankar dha gjithsej 28.2 miliardë lekë kredi për biznesin, në rënie me 8.9% krahasuar me të njëjtën periudhë të vitit të kaluar. Pjesërisht, te bizneset rënia është ndikuar edhe nga kursi i këmbimit, duke qenë se në këtë segment kredia në valutë të huaj ka peshë specifike më të lartë.
Megjithatë, për të gjithë 8-mujorin kredia e re për biznesin ngelet në rritje. Sektori bankar deri tani ka dhënë më shumë se 201 miliardë lekë kredi të re për bizneset, në rritje vjetore me 10.4%
Kredia e re për individët në gusht vijoi rritjen e qëndrueshme, në linjë me tendencën pozitive të viteve të fundit. Kredia e re kishte vlerën e 11.4 miliardë lekëve, në rritje me 29.3% krahasuar me gushtin e vitit të kaluar. Edhe për 8-mujorin kredia e re ngelet në rritje të ndjeshme. Ajo arriti vlerën e 98.8 miliardë lekëve, në rritje me 15% krahasuar me një vit më parë.
Kreditimi i individëve është mbështetur te një rritje paralele dy segmentet kryesore, të blerjeve të pasurive të paluajtshme dhe financimit të konsumit.
Pas një frenimi në muajt e parë të vitit, kredia për shtëpi i është kthyer rritjes dhe për 8-mujorin 2026 arriti vlerën e 47.3 miliardë lekëve, në rritje me 4.5% krahasuar me të njëjtën periudhë të një viti më parë. Pavarësisht paketës së masave shtrënguese të Bankës së Shqipërisë, bankat po vazhdojnë të rrisin financimin për blerjen e banesave nga familjet.
Ndërkohë, kredia e re konsumatore për 8-mujorin ka arritur në gati 52 miliardë lekë, 27% më shumë krahasuar me të njëjtën periudhë të një viti më parë.
Në fund të muajit gusht, edhe portofoli total i kredisë për ekonominë, i shprehur si tepricë, vijoi rritjen. Ai kishte vlerën e 1 trilion e 7 miliardë lekëve, duke u zgjeruar me afërsisht gjashtë miliardë lekë krahasuar me korrikun. Me bazë vjetore, kredia ruan rritjen dyshifrore, me 11.8% më shumë krahasuar me gushtin e vitit 2025.
Rritja është më e lartë në segmentin e individëve, ku portofoli ka arritur vlerën e 426.6 miliardë lekëve, në rritje me 17.2% krahasuar me një vit më parë.
Ndërsa në segmentin e biznesit vlera e portofolit të kredisë arriti në 490.4 miliardë lekë, në rritje me 10.3% krahasuar me të njëjtën periudhë të një viti më parë.
/Monitor
