Kredia në lekë zë 40% të totalit të huadhënies, nga 33% që zinte në vitin 2012.
Banka e Shqipërisë ka publikuar zhvillimet kryesore të treguesve të kredisë ku evidenton se, rritja e shpejtë e kreditimit në valutë ishte pasojë e rënies së normës së interesit të kredisë në valutë dhe hendekut të madh, i cili u krijua mes normave të interesit të kredisë në lekë dhe asaj në valutë (kryesisht gjatë viteve 2004-2009).
Kryesisht, që prej fundit të vitit 2012, ecuria vjetore e kredisë në lekë shfaqet pozitive duke u zgjeruar ndjeshëm nga viti në vit, ndërsa teprica e kredisë në valutë, gjatë kësaj periudhe, shfaq ecuri vjetore negative.
Këto zhvillime kanë ngushtuar hendekun midis kredisë në lekë dhe asaj në valutë. Rritja e kreditimit në monedhën vendase vitet e fundit, është mbështetur nga rënia e vijueshme e normës së interesit për kredinë në lekë. Kostoja e kreditimit në lekë ka ndjekur ecurinë e normës bazë të politikës monetare.
Kjo e fundit është ndryshuar 10 herë që prej fundit të vitit 2012, në minimumin e ri historik 1.5% (në prill 2016). Në rënie kanë qenë edhe normat e interesit të kredisë në valutë, por rënia e tyre në 10 vitet e fundit ka qenë më e moderuar. Ndërsa sot diferenca e normave të interesit të kredisë në lekë me ato në valutë është ngushtuar dukshëm, duke përkrahur edhe zhvendosjen e portofolit drejt kreditimit në lekë.
