Partia Demokratike ka vijuar edhe sot sulmet ndaj kandidatit të majtë për Tiranën, Erion Veliaj.
Akil Kraja, Kordinator i PD, thotë se Veliaj ka mashtruar dhe se nuk ka krijuar inkubatorë të biznesit rinor.
“Sot më shumë se kurrë qytetarët shqiptarë kërkojnë një politikë të sinqertë, një politikë e cila të mos jetë një fotokopje e premtimeve të pambajtura të fushatës 2013.
Sot kërkojnë sinqeritet. I kujtojmë premtimin e radhës së kandidatit Veliaj i cili përsëri është një fotokopje e një premtimi-mashtrim. Do të krijohen inkubatorë të biznesit rinor që u mundësojnë të rinjve sipërmarrës hapësira për zyra me lehtësira administrative.
Ku janë sot këta inkubatorë. Ku janë sot hapësirat e përbashkëta të punës për të rinjtë shqiptarë. Ku është suksesi i ministrisë e cila kishte plotë 40 përqind të buxhetit të shtetit shqiptar.
Sot qytetarët shqiptarë janë të lodhur nga premtim-mashtrimet, nga një politikë e vjetër e cila realisht është thjesht për të bërë zhurmë. Sot të rinjtë largohen nga Shqipëria, sot të rinjtë janë të papunë dhe kërkojnë angazhime konkrete, serioze dhe të qeta në zhvillimin ekonomik të vendit.
Ne çdo ditë do të përmendim një premtim-mashtrim të kandidatit Veliaj i cili duhet të ndërgjegjësohet se premtimet e tij nuk pinë më ujë.”, thuhet në deklaratë.
