Komisioni Qendror i Zgjedhjeve vendosi sot të mos pranojë propozimin për të shpallur të përfunduar përpara kohe mandatin e deputetit Tom Doshi. Vendimi i KQZ-së, erdhi pas një kërkese të Prokurorisë, sipas së cilës, deputeti, i cili në zgjedhjet e 25 Qershorit do të garojë për PSD-në në Shkodër, ka pasur një dënim në vitin 1990, i cili bën pjesë në listën e dënimeve që preken nga ligji i dekriminalizimit. Por siç u vërejt edhe nga anëtarët e KQZ-së, periudha që ka kaluar ka shërbyer për rehabilitimin e deputetit Doshi.
DOSJA E DOSHIT
Zoti Doshi ka deklaruar në formular, nën pyetjen 1 të tij, një vendim penal dënimi të formës së prerë nr.18. datë 25.05.1990, të Kolegjit Ushtarak të Rrethit Gjyqësor Durrës, ku është dënuar me 1 vit heqje lirie për veprën penale të “Sjelljes së padenjë në shoqëri”, parashikuar nga neni 129 i Kodit Penal të Kohës.
Nga verifikimet e kryera po nga Prokuroria e Përgjithshme, nga Dëshmia e Gjendjes Gjyqësore rezulton se z.Doshi është arrestuar në 26.02.1990 dhe është liruar me datë 13.09.1990 dhe po nga Dëshmia e Gjëndjes Gjyqësore rezulton se z.Doshi në cilësinë e të pandehurit të dënuar për këtë vepër penale është i rehabilituar.
Në referim të dispozitave të ligjit 138/2015, prokuroria ka konstatuar se z.Tom Doshi përfshihet në fushën e ndalimit të parashikuar në nenin 2, pika 1, gërma “ç” të ligjit nr.138/2015, për kryerjen me dashje të një krimi që nuk përfshihet në shkronjat “a” dhe “b” të pikës 1 të nenit 2 të ligjit por në germën ç të kësaj pike, për kryerjen e një krimi me dashje të dënuar jo më pak se 6 muaj burgim.
ma.me
