Ish-kryetari i Komisionit Qendror të Zgjedhjeve, Kristaq Kume, e sheh të pamundur, që zgjedhjet për bashkinë Tiranë të zhvillohen më datë 9 nëntor 2025.
Në një prononcim për gazetaren e tvklan.al, Enxhi Dogjani, pas vendimit të sotëm, 9 tetor, të Gjykatës Kushtetuese për pezullimin e dekretit presidencial për zgjedhjet e pjesshme në kryeqytet, ai thotë se KQZ nuk ka asnjë fuqi veprimi lidhur me procesin zgjedhor për bashkinë më të madhe në vend.
“Me këtë pezullim, Komisioni Qendror i Zgjedhjeve nuk ka asnjë fuqi veprimi, ndikon në të gjithë ecurinë e procesit, sepse nuk regjistrohen dot as kandidatët për secilin subjekt politik”, argumentoi Kume, duke pasur parasysh se më 31 tetor 2025 në Gjykatën Kushtetuese mbahet seanca publike për ankimimin e Erion Veliajt, që u shkarkua nga posti i kryetarit të bashkisë, me vendim të Këshillit të Ministrave më 25 shtator.
“Derisa Kushtetuesja ka marrë këtë vendim në mënyrë unanime, do të thotë që procesi ka pasur parregullsi nga ana ligjore”, shtoi Kume, duke theksuar se në dijeninë e tij ky rast është i paprecedentë, pasi asnjëherë më parë nuk ka ndodhur që një Gjykatë të pezullojë dekretin e Kreut të Shtetit.
“Partitë politike të bëjnë çfarë të duan, nuk bëhet dot asnjë veprim! Kanë nisur hapat e shtetit ligjor”, tha ai.
Gjykata ka vendosur këtë të enjte, njëzëri të kalojë çështjen me kërkues Erion Veliaj në seancë plenare publike në datë 31 tetor 2025 dhe të pezullojë dekretin e Presidentit për pjesën që cakton datën e zgjedhjeve në bashkinë Tiranë.
