Pas dëgjesës dhe shqyrtimit rast pas rasti, KQZ vendosi që të mos u hiqet mandati asnjërit prej 13 deputetëve dhe 8 kryebashkiakëve, që kishin plotësuar formularin e vetëdeklarimit jashtë afatit të përcaktuar nga ligji. Mbledhja e KQZ u zhvillua me debatë të shumta dhe opozita u largua para se të merrej vendimi. Në një deklaratë, kryetari i KQZ-së, Denar Biba deklaroi se asnjërit nga 13 deputetët dhe 8 kryebashkiakët nuk i hiqet mandati, vendim i cili u mor me katër vota pro.
KQZ hodhi poshtë kështu edhe pretendimin e Prokurorisë, që kërkonte ndërprerjen e mandatit për kreun e Bashkisë së Poliçanit dhe atë të Bashkisë së Tepelenës. Argumentimi i Prokurorisë është se Zotkaj dhe Peçi nuk kishin treguar dënimet që kishin marrë, pavarësisht se dënimet nuk ishin shkak për heqjen e mandatit, mosdeklarimi është argumenti i përdorur nga organi i akuzës.
Çfarë ndodhi më herët në KQZ
Ky proces ka sjellë debate të ashpra mes përfaqësuesve të shumicës dhe pakicës poltike. 3 anëtarët e opozitës në KQZ braktisën mbeldhjen pas disa orësh debate.
Bëhet fjalë për Hysen Osmanajn, Klement Zgurin si dhe Vera Shtjefnin.
Vera Shtjefni tha se sot dekriminalizimi kishte marrë goditje të rëndë. Ndërkohë, Zguri theksoi se ky gjykim ishte politik, pasi KQZ kishte thirrur njerëz që nuk kishte arsye të ishin në ato lista.
Ndërkohë, kreu i KQZ-së, Denar Biba tha se fakti që janë bashkuar listat nuk do të thoshte se ishte e njëjta situatë. “Gabimet në formular, mund të humbësh mandatin. Nuk kanë plotësuar saktë formularin sipas prokurorisë. Për ne e kanë plotësuar saktë formularin. Mirë do ishte që formulari të hartohej ndryshe”, tha Biba.
LISTAT
Ndër emrat e listuar nga KQZ janë deputetët Sali Berisha, Arben Ristani, Eduard Halimi, Florian Mima, Myqerem Tafaj, Spartak Braho, Vangjel Dule, etj; të cilët kanë deklaruar të dhëna në formularin e dekriminalizimit, jashtë afateve të parashikuara në ligj. Krahas deputetëve të mësipërm në listë janë dhe 8 kryetarë bashkish: Artur Bardhi, Edmond Themelko, Ndrec Dedaj, Rajmonda Balilaj, Adel Lala, Zef Hila, si dhe dy kryebashkiakët Tërmet Peçi dhe Adriatik Zotkaj.
Për dy të fundit prokuroria ka kërkuar ndërprerjen e mandatit, pasi nuk kanë deklaruar dënime të marra më parë.
