Komisioni Qëndror i Zgjedhjeve rrëzoi kërkesën e Partisë Demokratike për çregjistrimin e Altin Bibës me 4 vota pro.
Në mbledhjen e sotme anëtarët e KQZ-së kundërshtuan të çregjistronin Altin Bibën, pas kërkesës së Partisë Demokratike, dhe vetë vullnetit të Bibës, i cili është tërhequr nga gara dhe ka thënë se nuk do të kandidojë pavarësisht vendimit të KQZ-së apo të Kolegjit Zgjedhor. Kështu pas këtij vendimi Altin Biba do jetë në fletën e votimit në Kurbin.
Nënkryetari i Komisionit Qendror të Zgjedhjeve Denar Biba rilexoi para anëtarëve të KQZ dhe përfaqësuesit ligjor të PD-së, Ivi Kaso mesazhin ndaj kandidatit të PD-së në Pogradec Eduard Kapri i cili kërcënohej të dorëhiqej nga gara elektorale me arsye shëndetësore ose familjare në të kundërt do të kishte pasoja.
“Ky mesazh i është dërguar Kaprit, po për fat të mirë se lejuam këtë precedent, të ndryshimit të kandidatëve, do i kishim mundësuar mafiozëve të Shqipërisë të luanin me ata që duam të na përfaqësojnë në pushtetin lokal. Nuk duhet ta lejojmë një gjë të tillë. Partitë duhet të jenë serioze kur përzgjedhin kandidatët të marrin përgjegjësitë për ata që kanë vendosur”, – tha Biba.
Ndërkohë, anëtari Klement Zguri tha se e mbështet kërkesën e demokratëve për dorëheqjen e Bibës, duke argumentuar këtë qëndrim me tre vendime të mëparshme të KQZ-së për të cregjistruar disa kandidatë të pavarur.
“Tendenca për ta politizuar nuk është korrekte, në tre raste KQZ me vendim ka dhënë tre raste përtej arsyetimit që ju bëni. Jam për ta mbështetur këtë kërkesë”, tha Zguri.
Shtjefni: PD nuk ka kandidatë për shkak të dorëheqjes. Nëse se pranojmë mendoj se shkojmë në zgjedhje mbi një falsitet të madh që dëmton edhe interesin e zgjedhësve
