Komisioni Qendror i Zgjedhjeve ka vendosur hapjen e kutive të zgjedhjeve vendore në Durrës. Vendimi është marrë sot nga KQZ, pas shqyrtimit të ankesës së bërë nga Partia Demokratike.
Përmes përfaqësuesit ligjor të PD Ivi Kaso, selia blu pretendon se në disa qendra votimi, janë rreth 250 emigrantë të cilët nuk kanë qenë në Shqipëri dhe se është votuar në emër të tyre nga persona të tjerë.
Sipas Kasos, ky problem është në të paktën 7 qendra votimi, dhe se për këtë PD ka fakte të cilat ndodhen edhe në materialet zgjedhore.
“Kërkojmë shpallje të pavlefshme të zgjedhjeve në disa Qendra Votimi në Durrës dhe nxjerrja e rezultatit është votuar në shkelje të ligjit. Janë të paktën 250 emigrantë për të cilët është votuar nga persona të tjerë. Kjo është një ngjarje e rëndë, kemi pasur komisionerë, dhe faktet të cilat pretendojmë janë në materialin zgjedhor, aty ku gjenden edhe kartat e identitetit.” tha Kaso
Pasi dëgjoi kërkesën e PD, KQZ vendosi hapjen e kutive për të verifikuar materialet zgjedhore, dhe listat fiktive të pretenduara nga opozita.
