Komisioni Qendror i Zgjedhjeve, ka vendosur të marrë në shqyrtim kërkesën e PD-së për zhvillimin e 3 referendumeve në Tiranë, në lidhje me ndërtimin me koncesion të një parkimi nëntokësor tek Parku Rinia; për ndërtimin e objekteve social-kulturore, universitare dhe administrative në dy anët e korpusit të Universitetit Politeknik; si dhe ndërtimin parkut të lojrave të fëmijëve te Parku i Liqenit. Kërkesat për referendum janë depozituar disa të ditë më parë në KQZ nga Jamarbër Malltezi, dhëndërri i ish- kryeministrit, Sali Berisha. KQZ-ja ka planifikuar që këto tre kërkesa për referendum të paraqitura nga ana e PD-së ti marrë në shqyrtim ditën e premte dt. 18 mars.
Pyetjet që PD-ja kërkon të jenë pjesë e këtij referendumi janë: 1. “A jeni dakord me vendimin nr. 67 datë 30.12.2015 të Këshillit Bashkiak për ndërtimin me koncesion të një parkimi nëntokësor tek Parku Rinia”? 2. “A jeni dakord me vendimin për të ndërtuar objekte social-kulturore, universitare dhe administrative në dy anët e korpusit të Universitetit Politeknik”? 3. “A jeni dakord për të ndërtuar parkun e lojrave në zemër të Parkut të Liqenit sipas vendimit nr.1, datë 12.02.2016 të Këshillit Bashkiak Tiranë”?
Kërkesave për referendum, sidomos për ndërtimin e parkut të lodrave të fëmijëve te liqeni artificial, PD-ja i parapriu me një protestë të dhunshme disa ditë më parë, ku shkatërroi ndërtimet e saponisura, mjete të firmës, si dhe u përplas me forcat e policis. Kundërshtit për parkun e lojërave të fëmijëve u nisën nga grupe ambientaliste, por PD-ja nuk humbi rast për ti marrë vetë “frerët në dorë” të kësaj çështje, duke kërkuar me këtë rast dhe referendum.
(javanews.al) Me. Ar
