Projektvendimi për caktimin e partive politike, anëtarëve dhe sekretarëve në komisionet zonale të administratës zgjedhore, çoi në hedhjen e shortit, i cili përcaktoi se kujt kahu politik i takon.
Duke qenë se Partia Socialiste, si shumicë parlamentare, ka 74 mandate, dhe duke iu referuar shkresës së Kuvendit si përgjigje ndaj kërkesës së KQZ-së për historikun e votimeve të fundit, kjo forcë politike do të ketë në KZAZ, 2 anëtarë. Partia Socialdemokrate, si forcë e dytë mazhorancë në Kuvend, do të ketë 1 anëtar.
Gjithashtu, në ndarjen e numëruesve dhe anëtarëve, komisionet zonale të administrimit të zonave të opozitës do t’u takojnë 2 përfaqësues nga Partia Demokratike dhe 1 anëtar nga Partia e Lirisë.
Një tjetër pikë që diskutoi KQZ ishte miratimi i modeleve të një pjese të dokumentacionit zgjedhor që i dërgohet zgjedhësve nga jashtë. Sipas këtij projektvendimi, parashikohet që në dokumentacionin që i dërgohet zgjedhësve jashtë vendit, të përfshihen fleta e votimit, zarfi, materiali udhëzues, si dhe procedura e kthimit të fletës së votimit në KQZ, së bashku me zarfin e jashtëm që përmban fletën e votimit.
Projektvendimi për fletën e votimit të diasporës është hartuar në mbështetje të ndryshimeve të fundit të Kodit Zgjedhor, me qëllim përcaktimin e rregullave për përdorimin e pjesës së dokumentacionit që i dërgohet zgjedhësve jashtë vendit.
