Komisioni i Pavarur i Kualifikimit ka zbardhur vendimin e plotë për shkarkimin nga detyra të gjyqtarit të Beratit, Agron Vavla. Në vendim bie në sy që Vavla ka probleme të shumta me pasurinë dhe hetimi i KPK është përqendruar vetëm tek ky kriter. Një ndër problemet e konstatuara që vlen të veçohet është ai i shumës së paguar për shkollimin dhe jetesën e djalit të Vavlës në SHBA.
“Subjekti me anë të postës elektronike deklaroi se, E.V., mё datë 14.08.2016, ka udhëtuar drejt SHBA për studime dhe për shkollimin e tij, subjekti ka shpenzuar dhe paguar shumën prej 64.020,04 USD sipas kësteve të përshkruara më poshtë:
Vjeshtë 2016 shuma prej 18.230,90 USD; Pranverë 2017 shuma prej 23.241,14 USD; Vjeshtë 2017 shuma prej 22.584,80 USD;
Më tej subjekti deklaroi se shpenzimet për jetesën e djalit nё SHBA, janë nё shumën 12.000 USD, të cilat ndahen 25 USD /dita X 30 ditë = 750 USD në muaj.
Dhe për periudhën shtator 2016 – 31.12.2017 = 16 muaj X 750 USD = 12.000 USD.
Shpenzime për jetesë dhe shkollim nga gushti i 2016 – 31.12.2017, subjekti ka deklaruar shumën prej 76.020,04 USD”, thuhet në vendim.
Por problemi qëndron tek fakti që Agron Vavla ka mungesë të burimeve financiare të ligjshme për të paguar shumat e lartpërmendura për shkollimin dhe jetesën e djalit në SHBA.
Sipas vendimit, Vavla po ashtu nuk ka deklaruar se për djalin e tij në Amerikë ka kontribuar edhe kunati i tij duke dhënë 34 mijë dollarë.
“Pagesa nga sponsori, z. L.G.B., bashkëshorti i hallës, znj. L.B., në shumën 34.965 USD.
Nga këto 19.965 USD për vitin 2016, 15.000 USD për vjeshtë të vitit 2017.
Pagesa nga shtetasi amerikan, z. Sh.Rr., në shumën 23.241,14 USD.
Ky shtetas, deklaron subjekti, ka marrë kredi në emër të tij dhe vlerën e kredisë e ka dërguar për financimin e shkollës së personit të lidhur/djalit të subjektit.
Shlyerja do të fillojë pas përfundimit të shkollës.
Subjekti i rivlerësimit ka fshehur në deklaratë “Veting” sponsorizimin e bërë nga, z. L.B., në shumën 18.230.90 USD në vitin 2016, duke mos e deklaruar tek detyrimet.
Subjekti i rivlerësimit ka kryer deklarim të rremë dhe ka mungesë të burimeve të ligjshme financiare gjatë vitit 2016 për shkollimin dhe akomodimin e personit të lidhur/djalit të tij”, thuhet në vendimin e KPK.
/a.meta
