Kryediplomati grek Kotzias ka bërë të ditur se ka qenë ish kryeministri Sali Berisha ai që informoi se “Marrëveshja e Detit” mes Shqipërisë dhe Greqisë është shfuqizuar nga Gjykata Kushtetuese falë ndërhyrjes së Turqisë. Këto deklarata shefi i diplomacisë greke i bëri kur u pyet në lidhje me intervistën e kryeministrit shqiptar Edi Rama me media greke.
“Deklaratat e Ramës ishin një përpjekje e tij që të kërkonte falje nëse apelimi në Gjykatën Kushtetuese të Shqipërisë për marrëveshjen e detit u bë ose jo me ndërhyrjen e Turqisë, siç e ka akuzuar edhe Sali Berisha. Është çështje e tyre e brendshme. E tha Berisha që ai veproi me urdhër të një vendi të tretë, unë s’kam çfarë të them. Është problemi i tyre”, deklaroi Kotzias, kur u pyet në lidhje me deklaratat e Ramës në televizionin grek për çështjen e kufirit detar mes dy vendeve dhe anulimin nga Gjykata Kushtetuese.
Diplomati grek u ndal edhe te nacionalizmi, duke deklaruar se i ka rekomanduar Shqipërisë që të ulë tonet në prag të fushatës elektorale.
“Kemi vënë re shfaqjen e një nacionalizmi të fuqishëm nga ana e një pakice të elitës politike në Shqipëri. Edhe kundërshtimi i tyre për t’i dhënë nënshtetësinë shqiptare kryepeshkopit Anastas është një tregues i këtij nacionalizmi” ka deklaruar Kotzias.
Në fund, Kotzias theksoi se Shqipëria duhet që të respektojë traktatet ndërkombëtare për minoritetet.
“I kemi thënë Tiranës që për t’u integruar në familjen europiane përvec luftës ndaj krimit dhe korrupsionit duhet të respektojë edhe minoritetin” përfundoi ai.
Me. Ar
