Kreu i PDK-së, Hashim Thaçi, i ka hapur të mërkurën “kartat e fundit” para deputetëve të tij, duke u thënë atyre se do të dorëhiqet nga drejtimi i partisë nëse nuk e mbështesin Gjykatën Speciale në Kuvend.
Duke e parë këtë pozicion të shefit të tyre, disa deputetë që nuk e kanë përkrahur krijimin e Speciales tashmë kanë ndryshuar qëndrim, duke e siguruar Thaçin se do ta votojnë Gjykatën Speciale, e cila pritet të jetë në rend dite javën e ardhshme.
Këtë gjë e kanë konfirmuar për gazetën “Zëri” burime brenda takimit të Grupit Parlamentar të PDK-së, të cilin e ka udhëhequr Thaçi.
Sipas këtij burimi, deri javën e ardhshme secili deputet individualisht duhet ta njoftojë Thaçin për pozicionin që do ta mbajë rreth krijimit të Dhomave të Veçanta më qëllim që kur të thirret seanca të mos dështojë Specialja.
