Vetëm për tre muaj në Kosovë janë sekuestruar rreth tre milionë euro pasuri e fituar në mënyrë të paligjshme. Ndërkaq, vlera e përgjithshme për këtë vit ka arritur shumën rreth 20 milionë euro.
Këto të dhëna janë bërë të ditura në prezantimin e raportit për tremujorin korrik-shtator, nga Koordinatori Nacional për Luftimin e Krimit Ekonomik, Shqipdon Fazliu, para anëtarëve të Këshillit Prokurorial të Kosovës.
Fazliu tha se nëse trendi i sekuestrimeve vazhdon kështu, atëherë do ta kalojnë shifrën e vitit të kaluar.
“Shifra e sekuestrimeve ka arritur në pothuaj 20 milionë euro. Edhe gjatë periudhës së tretë, korrik-gusht, ka pasur sekuestrime në vlerë të përgjithshme prej rreth 3 milionë euro, apo më saktësisht 2 milionë e 743 mijë euro”, tha Fazliu.
Koordinatori nacional ka kritikuar edhe disa prokurorë për moskryerje të detyrës së tyre ashtu siç duhet në zbatimin e dispozitave për konfiskim dhe të ligjit mbi kompetencat e zgjeruara për konfiskim.
Në këtë drejtim, kryeprokurori i shtetit Aleksandër Lumezi i ka kërkuar Fazliut, që në raportin e ardhshëm t’i përmend me emër e mbiemër të gjithë ata prokurorë që nuk e kanë kryer detyrën e tyre si duhet, në mënyrë që të dërgohen tek zyra e prokurorit disiplinor dhe komisioni i performancës.
ATSH
